Ózbekstanda 70-ten astam bala ýlanyp, aýrýhanaǵa tústi

Ózbekstannyń Namangan oblysyndaǵy Chýst aýdanynda 9 balabaqshanyń 70-ten astam balasy men 2 oqýshy ýlanyp, aýrýhanaǵa tústi. Olardyń naqty neden ýlanǵany ázirge beımálim. Áleýmettik jelide ýlaný sebebi ıod preparatynan bolýy múmkin degen boljamdar aıtylyp jatyr, dep habarlaıdy QazAqparat Gazeta.uz basylymyna silteme jasap.

Balalardyń jappaı ýlanýy týraly eń aldymen áleýmettik jeli qoldanýshylary habarlady. Ata-analar balalaryna ıod preparaty berilgenin aıtady (osy aptada Ózbekstanda balalardy ıodtaý boıynsha aptalyq baǵdarlama bastalǵan).

Namanganliklar.uz Telegram arnasynda jarııalanǵan oblystyq densaýlyq saqtaý basqarmasynyń málimetinshe, 21 qyrkúıek kúni saǵat 16:00–den bastap aýdandyq medıtsına birlestigine 71 bala túsken.

Olardyń dene qyzýy kóterilip, keıbiriniń ishi aýyrǵan, dıareıa bolyp, qusyp jatqandary da bar.

Ákimshilik jedel jumys tobyn quryp, zertteý jumystaryn bastady. Jaǵdaıy táýir 9 bala úıine jiberildi. Qalǵan balalar baqylaýda.

Aýrýdyń naqty sebebi ázirge anyqtalmady.

22 qyrkúıek kúni tańerteń Ózbekstan Densaýlyq saqtaý mınıstrligi Chýsttaǵy balalardyń jappaı ýlanǵanyn rastaıtyn málimdeme taratty, biraq onyń yqtımal sebepteri men zardap shekkender sanyn naqtylamady.

«Búkil bala belgilengen standart boıynsha emdelip jatyr. Qorytyndy dıagnozdy qoıý úshin synama alynyp, talapqa saı zertteledi» delingen habarlamada.

Jaǵdaıdy Densaýlyq saqtaý mınıstri baqylaýǵa aldy.

10 bala úıine jiberilgen. Mınıstrlik qosymsha aqparat berýge ýáde berip otyr.

Túnde Bas prokýratýranyń baspasóz qyzmeti ýlaný faktisi boıynsha tergeý júrip jatqanyn habarlady. Jaǵdaı prokýratýranyń baqylaýyna alynǵan.

«Kámeletke tolmaǵandardyń neden ýlanǵany ázirge belgisiz bolǵandyqtan jurtshylyqtan jalǵan aqparat taratpaýdy suraımyz» delingen habarlamada.

Bas prokýratýra áleýmettik jelilerde Chýstta tótenshe jaǵdaı engizildi degen aqparatty joqqa shyǵardy.