Ózbekstanda 500 áıeldi avtobýs júrgizýshisi mamandyǵyna oqytý josparlanyp otyr

TAShKENT. KAZINFORM – Bul týraly BAQ ókilderine arnalǵan baspasóz máslıhatynda «Toshshahartranshızmat» AQ basshysynyń birinshi orynbasary Rýstam Shamýradov málim etti, dep habarlaıdy Kazinform agenttiginiń menshikti tilshisi. 

Aıta ketsek, buǵan deıin Ózbekstan úkimeti áıelderge qoǵamdyq jáne aýyr júk kólikterin basqarýǵa shekteý qoıatyn zańnama talabyn alyp tastady. Sáıkesinshe, qazirgi tańda Tashkentte eki áıel avtobýs júrgizýshisi bolyp jumys isteıdi. 

Endi «Toshshahartranshızmat» AQ áıel-júrgizýshilerdiń qataryn kóbeıtýge nıetti. 

– D jáne E sanatyndaǵy kólik basqarýǵa quqyǵy bar áıelderdi jumysqa qabyldaımyz. Bıyl 200 avtobýsty tizgindeıtin 500 áıeldi oqytý josparlanyp otyr.  Óıtkeni, biz qazir qoǵamdyq kólik júrgizip júrgen názik jandylardyń jumysyn joǵary baǵalaımyz. Olar jol erejesin buzbaıdy, temeki shekpeıdi jáne rýlde uıaly telefon paıdalanbaıdy, - dedi Rýstam Shamýradov. 

Eske salaıyq, Ózbekstanda avtobýs jolaǵyna túsken kólik júrgizýshilerine aıyppul salynýy múmkin. 

Sonymen qatar Ózbekstannan Qazaqstanǵa qatynaıtyn jańa avtobýs reısteri ashylady.