Ózbekstanda 50 jyldan asa qoldanysta bolǵan kólikterdiń júrýine tyıym salynady

TAShKENT. KAZINFORM – 1 aqpannan bastap Ózbekstanda 50 jyl jáne odan kóp paıdalanylǵan kólikterdiń júrýine tyıym salynady, dep habarlaıdy Kazinform agenttiginiń menshikti tilshisi.

Ózbekstannyń Mınıstrler Kabıneti tıisti qaýly qabyldady. Ol keler aıdan bastap kúshine enedi. Qujatta eski kólikter men arnaıy tehnıka úshin jańa sáıkestendirý standarttary qamtylǵan. 

Atap aıtqanda, quqyq qorǵaý organdary men Jol qozǵalysy qaýipsizdigi qyzmeti 50 jyl qoldanysta bolǵan avtomobılderdi qaıta tirkeýdi toqtatady. Mundaı temir tulparlar mindetti túrde esepten shyǵarylýy qajet.

Degenmen qaýlyda jazylǵandaı, kóliktiń sırek ekzemplıarmen shyǵarylǵany tıisti qujattarmen rastalsa, onda olarǵa “kóne jádiger” mártebesi beriledi. Sáıkesinshe, ony saqtaýǵa ruqsat etiledi.

Eske salaıyq, byltyr Ózbekstanda elektromobıl ımporty eki ese ósti. 

Qosa keteıik, byltyr Ózbekstanda 9 226 jol-kólik oqıǵasy bolyp, saldarynan 2 100-den astam adam qaza tapty. 

Buǵan deıin habarlaǵanymyzdaı, 10 ret ereje buzǵan ózbekstandyqtar endi kólik basqarý quqyǵynan aıyrylýy múmkin. 

Buǵan qosa, Ózbekstanda avtobýs jolaǵyna túsken kólik júrgizýshilerine aıyppul salynýy múmkin ekenin jazyp edik.