Ózbekstanda 4 mıllıonnan astam turǵyn koronavırýsqa qarsy ekpe alady
TAShKENT. QazAqparat – Ózbekstannyń Sanıtarlyq-epıdemıologııalyq salaýattylyq jáne qoǵamdyq densaýlyq qyzmetiniń málimetinshe vaktsınatsııanyń birinshi kezeńinde eldiń 4 mıllıonnan astam turǵyny koronavırýsqa qarsy ekpe alady, dep habarlaıdy QazAqparattyń menshikti tilshisi.
Vaktsınatsııanyń birinshi kezeńinde 4 112 668 adamdy tegin egý josparlanyp otyr.
Onyń arasynda:
1. Egde jastaǵy adamdar: - 65-ten 74-jasqa deıingi – 1 085 797 adam; - 75-ten 84-jasqa deıingi – 388 686 adam; - 85 jastan jáne odan joǵary– 139 280 adam;
2. Medıtsına qyzmetkerleri – 447 976 adam;
3. Sozylmaly aýrýlary bar adamdar – 888 190 adam;
4. Mektep muǵalimderi – 689 383 adam;
5. Mektepke deıingi bilim berý mekemeleriniń qyzmetkerleri – 223 426 adam;
6. Quqyq qorǵaý organdary men qarýly kúshterdiń ókilderi – 180 000 adam.
Ózbekstanda vaktsınatsııanyń bastalýy naýryzdyń birinshi jartysyna josparlanǵan.
Ony ótkizý úshin Tashkenttegi jáne eldiń barlyq aımaǵyndaǵy emdeý-profılaktıkalyq mekemelerinen 3138 kabınet bólingen.
Sonymen qatar halyqty koronavırýsqa qarsy vaktsınatsııaǵa 820 mobıldi brıgada tartylady.
