Ózbekstanda 3 myńnan astam sheneýnik jaýapqa tartyldy
Ózbekstan Bas prokýratýrasynyń málimetinshe, 2022 jyly respýblıkada 2965 qylmystyq is tirkelip, 3116 laýazymdy tulǵa jaýapqa tartylǵan. Onyń 110-y respýblıkalyq, 264-i oblystyq, 2742-si aýdandyq (qalalyq) basqarma qyzmetkerleri.
«Qylmystyq jaýapkershilikke tartylǵandar ózgeniń múlkin ıemdený jáne jymqyrý (2103), qyzmettik babyn asyra paıdalaný (265), alaıaqtyq (243), para alý (169), laýazymdyq jalǵandyq (51), laýazymdyq nemquraılylyq (22), bılikti asyra qoldaný (14) jáne basqa da qylmystar (249 adam)», - dep habarlaıdy Bas prokýroratýradan.
Vedomstvonyń málimetinshe, zań buzýshylyq saldarynan memleket pen qoǵamdyq múddelerge 1,12 trln sým (99 mln dollar) kóleminde shyǵyn keltirilgen, onyń 847 mlrd sýmy (75 mln dollar) aldyn ala tergeý barysynda óndirildi.
