Ózbekstanda 24 sharshy metrlik páterde 35 adam tirkeýde turǵan

TAShKENT. KAZINFORM — Ózbekstan Respýblıkasynyń Memlekettik salyq komıteti «E-ijara» aqparattyq júıesi arqyly tirkelgen jyljymaıtyn múlik jaldaý sharttaryn taldaý kezinde erekshe jaǵdaıdy anyqtady. 

Belgili bolǵandaı, jalpy aýdany 24 sharshy metrlik páterde 35 adam tirkelgen. Bul árbir jalǵa alýshynyń nebári 0,7 sharshy metr alańy bar ekenin bildiredi.

Sondaı-aq jalǵa alýshylardyń ekeýimen jasalǵan kelisimsharttarda jalǵa alynǵan páterdiń aýdany 0,5 sharshy metr dep kórsetilgen, al aı saıynǵy jaldaý aqysy 1,5 mıllıon sým bolyp belgilengen.

Ózbekstan zańnamasyna sáıkes, laıyqty ómir súrýdiń áleýmettik normasy bir adamǵa keminde 16 sharshy metrdi quraıdy.

Memlekettik salyq komıteti azamattarǵa turǵyn úıdi jalǵa berý kezinde jalǵa alýshylardyń jaıly ómir súrý jaǵdaılaryn qamtamasyz etý, sondaı-aq áleýmettik normalardy qatań saqtaý qajettiligin eske saldy.

Eske sala keteıik, Ózbekstanda dollar baǵamy quldyrady.