Ózbekstanda 2024 jyly ákimderdiń kómekshileri 309 sybaılas jemqorlyq qylmysyn jasaǵan
TAShKENT. KAZINFORM — Ózbekstanda 2024 jyly barlyǵy 6 898 adam sybaılas jemqorlyqqa qatysty 5 716 qylmys jasaǵan. Bul týraly Ózbekstan Respýblıkasy sybaılas jemqorlyqqa qarsy kúresý agenttigi baspasóz qyzmetiniń jetekshisi Sherzod Saparov málimdedi, dep habarlaıdy Kazinform agenttigi Gazeta.uz saıtyna silteme jasap.
Ol 2023 jylmen salystyrǵanda «Hýdýdgaztamınot» AQ, sý sharýashylyǵy, jergilikti ákimdikter men bank sektorlarynda sybaılas jemqorlyq qylmystary azaıǵanyn atap ótti. Degenmen, joǵary bilim, kólik jáne aýyl sharýashylyǵy salasynda ósý boldy.
Sybaılas jemqorlyq qylmystary mektepke deıingi jáne mektepke bilim berý, densaýlyq saqtaý, kedeılikti azaıtý jáne jumyspen qamtý salalarynda joǵary deńgeıde qalyp otyr.
Kedeılikti azaıtý jáne halyqty jumyspen qamtý mınıstrligi salasynda ákim kómekshileriniń qyzmetine baılanysty 2024 jyly sybaılas jemqorlyqqa qatysty 309 qylmys jasalǵany aıtyldy.
Óńirler boıynsha sybaılas jemqorlyq qylmystary Tashkent oblysy, Tashkent qalasy jáne Samarqand oblysynda jıi oryn aldy, al Buhara jáne Horezm oblystarynda sybaılas jemqorlyqqa qatysty qylmystar eń az boldy.
2024 jyly vedomstvoǵa barlyǵy 4176 ótinish túsip, olardy qaraý qorytyndysy boıynsha tıisti mınıstrlikter men vedomstvolarǵa, oblystyq jergilikti ákimdikterge 55 saýalnama joldandy, zań buzýshylyqtardy joıý týraly 41 usynys engizildi, 7 tulǵa tártiptik jaýakershilikke tartyldy, onyń ishinde 1 qyzmetkermen eńbek sharty buzylyp, 19 qaýlynyń kúshi joıyldy, 6 qylmystyq is jáne 10 ákimshilik is qozǵalyp, oryn alǵan qateler men kemshilikterdi joıý sharalary qabyldandy.
Sondaı-aq, vedomstvo 327 normatıvtik quqyqtyq aktiniń jobasyna sybaılas jemqorlyqqa qarsy saraptama júrgizip, onyń qorytyndysy boıynsha 327 jobanyń 71 paıyzynda, ıaǵnı 233-inde sybaılas jemqorlyqty týdyratyn 676 faktor anyqtalyp, olardy joıý sharalary qabyldandy.
Eske sala keteıik, Bıyl Ózbekstan úkimeti 5,2 mln adamdy jumyspen qamtýdy josparlap otyr.