Ózbekstanda 17 jastaǵy bozbala 31 keli esirtkini satpaq bolǵan

Ózbekstanda Tájikstan men Qyrǵyzstannan esirtki ákelip, satýmen aınalysqan azamattar ustaldy, dep habarlaıdy Kazinform Ózbekstan Memlekettik qaýipsizdik qyzmeti baspasóz qyzmetine silteme jasap. 

Memlekettik qaýipsizdik qyzmeti habarlaǵandaı, vedomstvanyń Ferǵana oblystyq departamentiniń qyzmetkerleri Tashlaq aýdanynda turatyn 2006 jyly týǵan azamattyń páterin tekserdi. 

Nátıjede, atalǵan mekenjaıda bolashaqta satý úshin saqtaýly turǵan 27 keli 573 gramm «gashısh» jáne 3 keli 967 gramm «apıyn» esirtkisi tárkilenip, protsessýaldyq tártipte rásimdeldi. Bul esirtkiniń Tájikstannan zańsyz ákelingeni anyqtaldy. 

Sonymen qatar Ándijan oblysy Qorǵantepa aýdanynyń 1986 jylǵy turǵyny Qyrǵyzstannyń Osh oblysynda turatyn 1984 jylǵy azamatpen sóz baılasyp, 1 keli 806 gramm sıntetıkalyq «mefedron» esirtki preparatyn satyp alýshyǵa 80 myń AQSh dollaryna satyp jatqan jerinde ustaldy. 

Jedel tekserý is-sharasy jalǵasyp, Qorǵantepa aýdanynda turatyn taǵy bir azamattyń úıinen 2 keli 698 gramm «mefedron» tabyldy. Bul sıntetıkalyq preparattar Qyrǵyzstannan ákelingeni anyqtaldy.