Ózbekstanda 1 myńnan astam saıası qýǵyn-súrgin qurbany aqtaldy
Ózbekstanda keńes úkimeti kezinde qýǵyn-súrginge ushyraǵan 1 myńnan astam adam aqtaldy. Bul týraly «Jadıdter: ulttyq biregeılik, táýelsizdik jáne memlekettilik ıdeıalary» atty halyqaralyq ǵylymı konferentsııa qatysýshylaryna joldaǵan hatynda prezıdent Shavkat Mırzıeev málim etti, dep habarlaıdy Kazinform agenttiginiń menshikti tilshisi.
Ózbekstan basshysy jańa tarıhı dáýirge aıaq basqan ýaqytta ata-baba salǵan sara joldan jańylmaı, olardyń eńbegin tıisti deńgeıde baǵalaý, baı murasyn zertteý jáne dáripteý negizgi mindet ekenin atap ótti.
«Konferentsııanyń negizgi taqyryby — bizdiń aǵartýshy ata-babalarymyzdyń progressıvti ıdeıalary men kózqarastaryn zertteý jáne júıeleý. Sondaı-aq, Túrkistan jadıdteriniń ulttyq memlekettiliktiń damý satysyndaǵy róli men áserin zertteý erekshe mańyzǵa ıe», — dedi Shavkat Mırzıeev.
Prezıdent atap ótkendeı, búginde Ózbekstanda halyq bostandyǵy men otannyń órkendeýi úshin óz ómirin qıǵan ata-babalardy eske alýǵa, olardyń qyzmeti men murasyn ózge qyrynan zertteýge erekshe nazar aýdarylady.
«Sońǵy jyldary Ózbekstannyń Joǵarǵy soty totalıtarlyq rejım qýǵyn-súrgininiń qurbany bolǵan 1030-dan astam otandasty aqtady. Bul tarıhı ádilettilikti ornatý jolyndaǵy taǵy bir qadam boldy», — dep atap ótti prezıdent.
Ózbekstan basshysy 31 tamyz elde qýǵyn-súrgin qurbandaryn eske alý kúni retinde keńinen atalyp ótetinin eske saldy.
«Mahallada qýǵyn-súrgin qurbandaryn eske alý buryshtaryn jáne onda eske alý kitaptaryn ashý, 100-ge jýyq qýǵyn-súrgin qurbandary men jadıdterdiń ómiri men qyzmetine arnalǵan jınaqtardy jyl saıyn daıyndaý jáne basyp shyǵarý kózdelgen. Osy mańyzdy taqyrypqa baılanysty muraǵat qujattaryna qoljetimdilikti keńeıtý, maqsatty ǵylymı-zertteý jumystaryn júrgizýge grant bólý, jańa kórkem jáne pýblıtsıstıkalyq týyndylar jasaý boıynsha sharalar qabyldanyp jatyr», — dep túıindedi Shavkat Mırzıeev.
