Ózbekstanda 1 mıllıonnan astam adam vaktsınalandy
TAShKENT. QazAqparat – Ózbekstanda ekpe naýqany bastalǵaly beri kornavırýsqa qarsy vaktsınanyń alǵashqy dozasyn 1 mıllıonnan astam adam aldy, dep habarlaıdy «QazAqparat» HAA menshikti tilshisi.
Ózbekstan Respýblıkasy Densaýlyq saqtaý mınıstrliginiń 6 mamyrdaǵy málimetteri boıynsha elde 1 009 510 adam ekpe saldyrǵan, olardyń 32 533-i vaktsınanyń ekinshi dozasyn alǵan.
Eldiń óńirleri arasynda vaktsınalaý boıynsha Ferǵana oblysy kósh bastap tur. Munda 128 838 adam egilgen. Reıtıngide kelesi oryndarǵa 118 093 adam ekpe saldyrǵan Andınjan oblysy, 108 560 turǵyny vaktsınalanǵan Namangan oblysy men 99 736 azamat egilgen Samarqan oblysy jaıǵasqan.
Eske sala keteıik, Ózbekstanda 1sáýirde ekpe naýqany bastaldy. Turǵyndardy vaktsınalaýmen qamtý birtindep keńeıtilýde: sáýirde iri qalalarda júrgizilse, mamyr aıynda aýdan ortalyqtary men iri qalalarda, al maýsymda – aýyldyq jerlerde jalǵasady. Vaktsınalaý úsh preparat – eýropalyq AstraZeneca, qytaı-ózbek taraptary birlesip shyǵarǵan ZF-UZ-VAC2001 jáne Reseıdiń «Spýtnık-V» vaktsınasy arqyly jasalyp jatyr. Úsh aıdyń ishinde Ózbekstan 4 mıllıonnan astam adamǵa ekpe salýdy josparlap otyr.
