Ózbekstanda 1,1 mıllıonnan astam adam vaktsınanyń birinshi komponentin aldy
TAShKENT. QazAqparat – Ózbekstanda ekpe kampanııasynyń basynan COVID-19-ǵa qarsy vaktsınanyń 1,5 mıllıonnan astam dozasy paıdalanyldy, dep habarlaıdy QazAqparattyń menshikti tilshisi Ózbekstan Respýblıkasynyń Densaýlyq saqtaý mınıstrligine silteme jasap.
Vedomstvonyń dereginshe, búgingi kúni elde vaktsınanyń 1 512 421 dozasy paıdalanylǵan. 1 151 313 ózbekstandyq birinshi dozany alsa, ekinshi dozany alǵandar sany – 358 108.
Óńirler arasynda búrynǵysha Ferǵana oblysy kósh bastap tur, onda 204 065 adam ekpe alǵan. Odan keıin reıtıngte Ándijan oblysy. Onda 189 110 adam ekpe alǵan. Namangan oblysy – 168 835 jáne Samarqan oblysy – 149 560 ekpe alǵandar.
Eske sala keteıik, Ózbekstanda ekpe kampanııasy 1 sáýirden bastaldy. Turǵyndardy vaktsınalaý aýqymy birte-birte kóbeıýde: sáýirde iri qalalar turǵyndary ekpe alsa, mamyrda aýdan ortalyqtary men kishi qalalar turǵyndaryn vatsınalaý jalǵasýda. Maýsymda aýyldyq jerler turǵyndaryna ekpe salý josparlanyp otyr. Vaktsınalaý úsh preparatpen júze asady: eýropalyq AstraZeneca vaktsınasy, qytaı-ózbek ZF-UZ-VAC2001 vaktsınasy jáne reseılik «Spýtnık-V». Bar bolǵany úsh aıdyń ishinde elde 4 mıllıon adamdy vaktsınalaý kózdelip otyr.
