Ózbekstan jerasty baılyǵy boıynsha álemdegi ondyqqa kiredi
ASTANA. QazAqparat - Qazaqstandyq geologtar Ózbekstandaǵy jerasty qazba baılyqtaryna barlaý jumystaryn birlesip júrgizýge daıyn. Bul týraly Tashkentte ótken «Ýzgeoınvest-2017» halyqaralyq konferentsııasynda aıtyldy, dep habarlaıdy Habar 24.
Onynshy ret uıymdastyrylyp otyrǵan sharaǵa álemniń túkpir-túkpirinen geologııalyq barlaý kompanııalarynyń ókilderi qatysty. Óıtkeni sheteldik ınvestorlarǵa barlyq sala boıynsha alǵash ret osyndaı múmkindik berilip otyr.
Ózbekstanda jalpy 1931 ken orny anyqtalǵan. Onyń basym bóligi táýelsizdik jyldary tabyldy. Negizi ontústiktegi kórshimiz jerasty paıdaly qazba baılyǵy jóninen álemdegi ondyqqa enedi. Jergilikti úkimettiń sheshimine sáıkes forýmda sheteldik ınvestorlarǵa 29 ken orny men qatty paıdaly qazbalary bar dep boljanǵan 111 joba usynylady.
Atap aıtar bolsaq, tizimde baǵaly zattardan altyn men kúmis, mys pen qorǵasyn jáne myrysh, sondaı-aq sırek kezdesetin metaldar men ýran jáne taǵy basqa taý-ken qazbalary bar. Ózbekstannyń jerasty qazba baılyǵyn ıgerý men ınvestıtsııalyq áleýetin arttyrýǵa baǵyttalǵan halyqaralyq forýmda sheteldik geologııalyq kompanııalarǵa memleket tarapynan jasalatyn jeńildikter men qujat toltyrý rásimi túsindirildi.
«Biz negizinen servıstik qyzmet kórsetetin kompanııamyz. Barlyq qyzmet túrin jasaımyz. Sondyqtan Ózbekstan naryǵyna qadam basýǵa daıynbyz. Atap aıtqanda zamanaýı tehnologııany endirý, burǵylaý jumystaryn júrgizýge tolyq múmkindigimiz bar. Munda geologııalyq barlaý jumystary qanshalyqty deńgeıde júrgizildi, jerasty qazba baılyǵynyń qory qansha jylǵa jetedi, ol týraly barlaý jumystary qashan júrgizilgen, jalpy geologııaǵa kóńil qanshalyqty bólingen sony naqtylaýymyz qajet. Aldaǵy 5 jylǵa jasaǵan josparlary qandaı sony bilýimiz kerek. Sondyqtan jumys óte kóp bolady dep oılaımyn», - dedi geologııalyq barlaý kompanııasynyń bas dırektory Qaısar Qojamuratov.
