Ózbekstan jastary úshin dıplomdy rastaý talabyn alyp tastaý kerek – sarapshy
ASTANA. KAZINFORM – Ózbekstandaǵy eńbek kúshteriniń, ásirese jastardyń Qazaqstanǵa kedergisiz kelýine jaǵdaı jasaý kerek. Belgili ekonomıst Saparbaı Jubaev Prezıdent Qasym-Jomart Toqaevtyń Ózbekstanǵa memlekettik sapary aıasynda osyndaı pikir bildirdi.
Sarapshynyń aıtýynsha, Ortalyq Azııa respýblıkalary ishinde Qazaqstan men Ózbekstan eń kúshti memleketter sanalady. Qos memleket arasynda kópsalaly baılanystar ornaǵan.
– Eń negizgileri – energetıka máselesi, metallýrgııa, hımııa ónerkásibi, aýylsharýashylyq ónimderin óńdeý, transporttyq-logıstıkalyq salalar aldyńǵy qatarda tur. Oǵan qosa, sońǵy kezderi týrızm, dári-dármek óndirýde de yntymaqtastyǵymyz ósip keledi. Sebebi eki respýblıkada da, máselen Ózbekstanda 38 mln bolsa, bizde 21 mlnǵa jaqyn halyq bar. ıAǵnı aımaqtaǵy halyqtyń 85 paıyzy osy eki respýblıkada turady, - dedi S. Jubaev Jibek Joly telearnasyna bergen suhbatynda.
Baýyrlas eki respýblıka arasyndaǵy odaqtastyq baılanys kóptegen múmkindikterdi ashady. Árıne keıbir sheshilmegen máseleler de bar.
– Mysaly sý máselesi, Ózbekstandaǵy eńbek kúshiniń joǵary bolýy, Qazaqstanda ınvestıtsııalyq múmkindikterdiń keń júzege asyrylýy bar. Menińshe, eki respýblıkanyń basshylarynyń, Prezıdentteriniń keńesi osy máselelerdi sheshýde, ekonomıkalyq baılanystardy 5 mıllıardtan 10 mıllıardqa jetkizýde, gýmanıtarlyq máselelerde, eńbek kúshteriniń, ásirese jastardyń bizge erkin kirýine, olardyń Qazaqstanda erkin jumys isteýine múmkindik jasaıdy.
Ózim ýnıversıtet oqytýshysy bolǵan soń, osy nostrıfıkatsııa (sheteldik bilim berý qujatyn moıyndaý) degen jasandy talapty joıý kerek. Sebebi bizdiń qazaqstandyq, ózbekstandyq jastar Eýropaǵa barsa esh aıǵaqtaý talap etilmeıdi, tek qana tildi bilse bolǵany. Al bizdiń ásirese Qazaqstannyń joǵary oqý oryndaryna Ózbekstannan kelgen qazaq jastary bolsyn, ózbek jastary bolsyn, bárin nostrıfıkatsııa rásimi mazalaıdy. Osy talapty alyp tastaýdy ótiner edim, - deıdi sarapshy.
Eske salaıyq, 14-15 qarasha kúnderi Qasym-Jomart Toqaev Ózbekstan Prezıdenti Shavkat Mırzıeevtiń shaqyrýymen Tashkentke memlekettik sapar jasady. Memleketter basshylary shaǵyn jáne keńeıtilgen quramda kelissóz júrgizip, Qazaqstan-Ózbekstan Joǵary memleketaralyq keńesiniń ekinshi otyrysyn ótkizdi.
Buǵan deıin Qazaqstan men Ózbekstan prezıdentteri BAQ ókilderine arnalǵan brıfıng ótkizdi.
Al 16 qarashada Prezıdent Tashkentte ótetin Ortalyq Azııa jáne Ázerbaıjan memleketteri basshylarynyń VII Konsýltatıvtik kezdesýine qatysady.