Ózbekstan jasandy jolmen jańbyr jaýdyrý tehnologııasyn engizýdi kózdep otyr

TAShKENT. KAZINFORM – Ózbekstan úkimeti 1 naýryzdan bastap jańbyrdy jasandy túrde jaýdyrý tehnologııalaryn engizýge baǵyttalǵan jobany zerdeleýge kirisedi, dep habarlaıdy Kazinform agenttiginiń Tashkenttegi menshikti tilshisi.

Tıisti Jarlyqqa kórshiles eldiń basshysy Shavkat Mırzıeev qol qoıdy. Jobany iske asyrý Ulttyq ekologııa komıteti, Ǵylym akademııasy jáne Tashkent oblysynyń ákimdigine júkteledi.

Bastamanyń negizgi maqsaty - jaýyn-shashynnyń túsimin 10-20%-ǵa arttyrý. Sáıkesinshe, ǵalymdar Frantsııa, Qytaı jáne Saýd Arabııasynyń ozyq tájirıbelerine taldaý jasap, tehnologııalardy Ózbekstan klımatyna beıimdeý múmkindigin qarastyrady.

Jarlyqta jazylǵandaı, joba álem boıynsha dáleldengen birneshe ádiske negizdele otyryp júzege asady. Máselen, búginde ushaqtyń kómegimen atmosferaǵa kúmis ıodıdin, qurǵaq muz nemese as tuzyn shashý tásili jıi qoldanylady.

Atalǵan elementter bultqa enip, kondensat kólemin arttyrady. Tıisinshe, joǵary deńgeıdegi ylǵaldan ulǵaıǵan tamshylar jańbyr túrinde túsedi. Ózbek tarapy bul synaqtarǵa baǵyttalatyn qarajatty Memlekettik nysanaly qordan aýdy josparlap otyr.

Qosa ketsek, buǵan deıin Ózbekstan kosmosqa óz ǵaryshkerin jiberý úshin daıyndyqqa kirisetinin jazyp edik. Sondaı-aq, Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady.