Ózbekstan «Jańa Tashkent» qurylysyn bastady
TAShKENT. QazAqparat – Ózbekstan Prezıdenti Shavkat Mırzıeev «Jańa Tashkent» jobasynyń alǵashqy tasyn qalaý rásiminde sóz sóıledi, dep habarlaıdy QazAqparat menshikti tilshisi Ózbekstan Respýblıkasy prezıdentiniń baspasóz qyzmetine silteme jasap.
«Búginde elimizdiń astanasynda turyp jatqan jáne jumys isteıtinderdiń sany 5 mln adamǵa jýyqtady. Bul kórsetkish aldaǵy jyldary odan ári artady. Qalada jylyna 20 myńnan astam kópqabatty turǵyn úı, 40-tan astam mektep, balabaqsha, emhana salýǵa suranys bar. Sondyqtan, kem degende 15-20 jylǵa arnalǵan jospardy naqty aıqyndaý qajet», - dedi Shavkat Mırzıeev.
Ózbekstan basshysy osy faktorlardy eskere kele, Tashkenttiń 2045 jylǵa deıingi bas josparynyń jobasy Ulybrıtanııa, Sıngapýr, Qytaı jáne Túrkııa mamandaryn tarta otyryp ázirlengenin atap ótti. Jospar Tashkent oblysynyń kórshiles aýdandary esebinen astana aýmaǵyn kezeń-kezeńimen keńeıtý, sondaı-aq Shyrshyq jáne Karasý ózenderi aralyǵyndaǵy «Jańa Tashkent» jobasyn júzege asyrý maqsatyn kózdeıdi.
«Qazirgi Tashkent 43 myń gektar aýmaqty alyp jatyr. «Jańa Tashkent» jobasy aıasynda qosymsha 20 myń gektar jerge 1 mıllıon adamǵa jaıly ómir súrýge jaǵdaı jasalady. Atap aıtqanda, birinshi kezeńde 60 myń turǵynǵa arnalǵan kópqabatty úıler, 30 mektep, 20 balabaqsha, kópsalaly aýrýhana, 5 otbasylyq emhana salynady», - dedi Shavkat Mırzıeev.
Onyń aıtýynsha, munda «Jańa Ózbekstan» ýnıversıteti, Ulttyq kitaphananyń jańa ǵımarattary, teatr, óner mektepteri, saýda jáne qyzmet kórsetý ortalyqtary da ornalasady. Birte-birte memlekettik mekemeler de «Jańa Tashkentke» kóshedi. Qazirgi ǵımarattardyń ornynda qonaq úıler, qyzmet kórsetý men saýda nysandary ashylyp, Tashkent zamanaýı týrıstik jáne iskerlik ortalyqqa aınalady.
Prezıdent elde alǵash ret turǵyn úı, kólik, jumys oryndary, mádenıet, sport jáne bilim berý nysandaryn qamtıtyn zamanaýı qalalyq jáne ǵylymı tásilderge negizdelgen smart tehnologııalar engiziletinin atap ótti.
