Ózbekstan zeınet jasyn ulǵaıtýdy josparlap otyr
ASTANA. KAZINFORM – Zeınetaqy qorynyń atqarýshy dırektory Mýrodbek Otajonovtyń málimdeýinshe, Ózbekstan zeınet jasyn ulǵaıtýdy josparlap otyr, dep habarlaıdy Spot.
Zeınetaqy reformasy jobasyna sáıkes, erlerdiń zeınetke shyǵý jasy qazirgi 60-tan 63-ke, áıelder úshin 55-ten 58-ge deıin ulǵaıtylady. Bul protsess kezeń-kezeńimen – jyl saıyn jarty jyl qosý arqyly júzege asyrylady.
Otajonov álemniń kóptegen elinde eń tómengi zeınet jasy 65 jastan joǵary ekenin atap ótti. Ózbekstanda «Azamattardy memlekettik zeınetaqymen qamtamasyz etý týraly» zań qabyldanǵannan beri, ıaǵnı 32 jyl boıy zeınet jasy ulǵaımaǵan.
– Ózbekstan ǵana qaldy, basqa elder zeınet jasyn kóterip qoıǵan, - dedi ol.
Sondaı-aq Zeınetaqy qorynyń dırektory eldegi ortasha ómir súrý uzaqtyǵy artyp kele jatqanyn aıtty. Densaýlyq saqtaý mınıstrliginiń málimetinshe, búginde bul kórsetkish 75 jasty quraıdy.
Otajonov zeınetkerlik jasty ulǵaıtý týraly túpkilikti sheshim áli qabyldanbaǵanyn jetkizdi. Zeınetaqy qory halyqtan zeınetaqy júıesin reformalaý boıynsha usynystardy jınaý úshin arnaıy alańdy iske qosýdy josparlap otyr. Usynystar bir aı boıy qabyldanady. Olardy zerdelegennen keıin qaıtadan talqylanyp, qajetti ózgerister engizilip, zeınetaqy reformasy jobasy resmı túrde kópshilik nazaryna usynylady.
Sonymen qatar Mýrodbek Otajonov zeınetkerlik jasty ulǵaıtýdyń jumsaqtaý nusqasyn da qarastyrýǵa bolatynyn sóz etti. ıAǵnı, jarty jasqa emes, jyl saıyn úsh aıǵa deıin kóterý. Bul rette zeınetkerlik jas ár tórt jyl saıyn bir jylǵa ulǵaıady, al reforma 12 jylǵa sozylady.
Eske sala keteıik, Ózbekstannyń halyqaralyq rezervteri alǵash ret 50 mıllıard dollardan asty.