Ózbekstan zardap shekkenderge kómektesý úshin Túrkııada dalalyq áskerı gospıtal qurady

ASTANA. QazAqparat - Qosymsha izdestirý-qutqarý toby, medıtsına qyzmetkerleri jáne gýmanıtarlyq kómek tıelgen ózbekstandyq ushaq Gazıantep qalasyna qondy, dep habarlaıdy QazAqparat tilshisi.

Ózbekstannyń Syrtqy ister mınıstrligi usynǵan aqparat boıynsha, ushaq Túrkııaǵa búgin bardy. Arnaıy bortpen jetken mamandar jer silkinisiniń saldaryn joıý, turǵyndarǵa medıtsınalyq kómek kórsetý jumysyna jumyldyrylady.

«Zardap shekkenderge kómek kórsetý úshin bir gektar alańǵa 9 jeke bólimshesi bar jyljymaly gospıtal keshenin qurý josparlanǵan. Onda Qorǵanys mınıstrligine qarasty medıtsınalyq jasaqtyń 50 qyzmetkeri ózderine júkteletin tıisti mindetterdi atqarady», - dep málim etti vedomstvodan.

Ózbekstan tarapy quratyn bul dalalyq gospıtal barlyq qajetti medıtsınalyq qurylǵylarmen jáne dárilik preparattarmen tolyq qamtamasyz etiledi.

Eske sala keteıik, buǵan deıin Ózbekstan Túrkııaǵa gýmanıtarlyq kómek pen qutqarýshylardy jibergenin habarlap edik. Qazirgi ýaqyttaǵy derekke sáıkes, Túrkııada bolǵan zilzala kezinde bir ózbekstandyq qaza tapty.

Foto: t.me/uzbekmid