Ózbekstan ıadrolyq otyn qaldyǵyn salynatyn AES-tiń aýmaǵynda saqtamaq

TAShKENT. KAZINFORM – Ózbekstan rekatorlardan shyǵarylatyn paıdalanylǵan ıadrolyq otyn qaldyǵyn salynatyn AES-tiń aýmaǵynda saqtaýdy josparlap otyr, dep habarlaıdy Kazinform agenttiginiń menshikti tilshisi.

Uzatom agenttiginiń dırektory Azım Ahmedhadjaev atap ótkendeı, paıdalanylǵan ıadrolyq otyn jáne radıoaktıvti qaldyqtarmen jumys isteý kezindegi qaýipsizdikti saqtaý konventsııasyna saı, aqyrǵy jaýapkershilik memleketke júkteledi.

- Negizgi maqsat – adam ómiri men densaýlyǵyn, jeke jáne zańdy tulǵalardyń múlkin qorǵaý, sondaı-aq materıaldyń zııandy áseriniń qorshaǵan ortaǵa tıgizetin zalalyn joıý. Sondyqtan bastapqy kezeńde barlyq talap pen erejeni múltiksiz oryndaı otyryp, paıdalanylǵan ıadrolyq otyn jáne radıoaktıvti qaldyqtardy atom elektr stantsııasynyń alańynda ýaqytsha saqtaý josparlanyp otyr, - dep jaýap qatty Azım Ahmedhadjaev Kazinform tilshisiniń saýalyna.

Sonymen qatar spıker Ortalyq Azııa elderi arasyndaǵy atom energetıkasyn damytý boıynsha yntymaqtastyqty nyǵaıtýdyń mańyzdylyǵyna toqtaldy.

- Bizdiń memleketimizdiń syrtqy saıasaty Ortalyq Azııa elderimen tatý kórshilik baılanystardy tereńdetýge baǵyttalǵan. Biz atom energııasyn beıbit maqsatta paıdalaný jónindegi komıssııanyń baǵdarlamasy aıasynda TMD memleketterimen yntymaqtastyqty nyǵaıtýǵa asa mańyz beremiz, - dep túıindedi Azım Ahmedhadjaev.

Agenttik dırektorynyń aıtýynsha, ózbek tarapy salynatyn atom elektr stantsııasyna qajetti ıadrolyq otyndy elde óndiriletin tabıǵı ýrannan alý múmkindigin zerdelep jatyr.

Eske salaıyq, Ózbekstanda AES salý úshin halyqaralyq konsortsıým qurylady.

Reseılik tehnologııa boıynsha óńirdegi alǵashqy az qýatty atom elektr stantsııasy salynady. Árqaısysynyń qýaty 55 MVt bolatyn 6 reaktor (jalpy qýaty – 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.

Osyǵan saı, taıaýda Ózbekstan men Reseı AES salý kelisimshartynyń kúshine ený hattamasyna qol qoıdy.