Ózbekstan Ýkraınadan óz azamattaryn evakýatsııalaıtyndyǵyn málimdedi

TAShKENT. ÓzA-QazAqparat – Kıevtegi Ózbekstan elshiligi qazir Ýkraınadaǵy jaǵdaıdyń shıeleniskendigine baılanysty óz azamattaryn evakýatsııalaıdy. Bul týraly búgin Kıevtegi Ózbekstan elshiligi óz otandastaryna arnalǵan resmı úndeýde jarııa etti, dep habarlaıdy QazAqparat ÓzA-ǵa silteme jasap.

«Ýkraınadaǵy jaǵdaıdyń shıelenisýin jáne tótenshe jaǵdaıdyń engizilgenin eskere otyryp, Ózbekstan Respýblıkasynyń azamattaryna habarlaımyz.

Qazirgi ýaqytta Ózbekstan Respýblıkasynyń Kıevtegi Elshiligi evakýatsııa josparyn jáne Ýkraına aýmaǵynan ketkisi keletin azamattardyń tizimin ázirleýde. Ýkraınanyń áýe keńistiginiń jabylýyn eskere otyryp, ushý baǵyttary men baratyn jeri daıyndalýda.

Qolaıly evakýatsııalaý joldaryna qatysty máseleler úshinshi elderdiń múddeli qyzmetterimen kelisilgendikten, Ózbekstan azamattary elshiliktiń www.uzbekistan.org.ua saıtynda jáne áleýmettik jelilerde qosymsha habardar etilmek.

Ýkraınadan ketkisi keletin Ózbekstan Respýblıkasynyń barlyq azamattary tólqujat málimetterin elshiliktiń [e-mail] elektrondy mekenjaıyna jiberýleri tıis.

Biz Ýkraınadaǵy Ózbekstan azamattaryn tynyshtyqty saqtaýyn jáne qosymsha suraqtary bolsa elshilikke habarlasýyn suraımyz», dep atap kórsetilgen dıplomatııalyq ókildik habarlamasynda.