Ózbekstan úkimeti jumyssyzdyq máselesin qalaı sheshpek

Bıyl Ózbekstan úkimeti 5 mln adamdy jumyspen qamtýdy josparlap otyr. Bul týraly prezıdent Shavkat Mırzıeevtiń qatysýymen ótken halyqty jumyspen qamtý máseleleri týraly keńeste aıtyldy, dep habarlaıdy Kazinform agenttiginiń menshikti tilshisi. 

Jıyn barysynda salaǵa jaýapty laýazymdy tulǵalar bıyl jańa jumys oryndaryn qurýǵa arnalǵan josparlardy jarııalady. Búginde resmı statıstıkaǵa sáıkes, 1,3 mln ózbekstandyq jumyssyz. Buǵan qosa bıyl eńbekke qabiletti jasqa jetken taǵy 2,4 mln adam naryqqa kiredi. 

Bul máselelerdi sheshý maqsatynda arnaıy baǵdarlama ázirlengen. Oǵan saı, qyzmet kórsetý salasynda - 2,5 mln, aýyl sharýashylyǵy baǵytynda - 2,1 mln, ınvestıtsııalyq jobalar men ónerkásipte - 250 myń al qurylysta 140 myń adamǵa qyzmet usyný múmkindigi bar. Sonymen qatar mıkroqarjylandyrý júıesin keńinen engizý arqyly bızneske 2 mln adamdy tartý kózdelip otyr.

Buǵan qosa keńeste kásipkerlik salasyndaǵy mindetti talaptardy qysqartý jáne lıtsenzııalaý tártibin jeńildetý usynystary da qaraldy. Oǵan baılanysty osy jyldan bastap anyqtamalar men esep qujattarynyń 34 túri joıyldy. Tıisinshe, 21 myńnan astam kásipker jyl saıyn 500 mln sým (18,3 mln teńge) únemdeı alady.