Ózbekstan úkimeti túrikmenstandyq júk kólikterinen alynatyn tólem mólsherin ulǵaıtty

TAShKENT. KAZINFORM – Ózbekstan úkimeti el aýmaǵyna kirgen sheteldik júk kólikterinen alatyn tólem mólsherin bekitti, dep habarlaıdy Kazinform agenttiginiń menshikti tilshisi.

Qujatqa sáıkes, Túrkimenstanda tirkelgen júk kólikterinen myna kólemde tólem alynady:

- 10 tonnaǵa deıin - $130 (buryn $50);

- 10-nan 20 tonnaǵa deıin - $180 ($100);

- 20 tonnadan joǵary - $250 ($150).

Bul rette Ázerbaıjan jáne Eýroodaq elderinen keletin júk kólikteri úshin alym mólsheri olardyń Ózbekstanda bolý ýaqytyna baılanysty esepteledi. Atap aıtqanda, 14 kúnnen aspaıtyn ýaqytta elden shyǵyp ketken kólikter - $80, bul merzimnen uzaq Ózbekstanda júrgender $280 tóleýi tıis.

Basqa elderden keletin jáne tranzıtpen ótetin júk kólikteri úshin tólemder ózgerissiz qaldy:

- Aýǵanstan - $50;

- Tájikstan - $100-200;

- Qazaqstan men Qyrǵyzstan - $300;

Buǵan deıin habarlaǵanymyzdaı, Qazaqstan men Ózbekstandy baılanystyratyn jańa temirjol jelisi salynyp jatyr.

Eske salaıyq, taıaýda prezıdent Shavkat Mırzıeev Qazaqstan men Ózbekstan shekarasynan jeke kýálikpen ótý tártibi engizilýi múmkin ekenin málim etti.