Ózbekstan úkimeti shyǵynǵa batqan kásiporyndardy qoldaýǵa $50 mln baǵyttaıdy
TAShKENT. KAZINFORM — Ózbekstan úkimeti shyǵynǵa batyp jatqan qurylys materıaly kompanııalaryn qoldaý úshin 50 mln dollar bóledi. Bul týraly el prezıdenti Shavkat Mırzıeevtiń tóraǵalyǵymen ótken keńeste málim boldy, dep habarlaıdy Kazinform agenttiginiń Tashkenttegi menshikti tilshisi.
Keńeste iri jobalarǵa qarajat baǵyttap jatqan ınvestorlar ıporttalatyn qurylys materıaldaryn qosylǵan qun salyǵynan bosatý bastamasyn kóterdi. Bul rette osyndaı jobalarǵa óz ónimderin usynǵysy keletin jergilikti kásiporyndar da az emes. Olar qosymsha qun salyǵynan bosatý jergilikti taýarlarǵa da qoldanylsa, onda laıyqty básekelestik tanytýǵa daıyn ekenderin málim etti.
Osyǵan baılanysty Ózbekstan basshysy quzyrly organdarǵa qoldaý sharalary qamtylǵan qaýly jobasyn ázirleýdi tapsyrdy.
Sonymen qatar Shavkat Mırzıeev qazirgi tańda qurylys materıaldaryn shyǵaratyn 457 kásiporynnyń bereshegi 3,5 trln sýmǵa (shamamen $290 mln) jetkenin atap ótti. Bul kompanııalardyń shyǵaratyn ónimi qymbat, tıisinshe olar tutynýshy taba almaı otyr.
Osy oraıda jaýapty vedomstvo basshylaryna atalǵan 457 kásiporynnyń árqaısysyn aralap, olarǵa qoldaý kórsetý baǵdarlamasyn daıyndaý mindeti júkteldi. Kompanııalardy qarjylyq ońaltýǵa 50 mln dollar bólinedi. Bul soma óndiris qýatyn arttyrý, naryqtarǵa joǵary suranysqa ıe ónim shyǵarý arqyly shyǵyndardy azaıtýǵa baǵyttalmaq.
Eske salaıyq, Ózbekstanda qurylys alańyn shańdatqandarǵa endi aıyppul salynady.
Buǵan deıin habarlaǵanymyzdaı, Ózbekstannyń iri qalalarynda qorshaǵan ortaǵa zalal keltiretin kásiporyndardy ashýǵa tyıym salynady. Sonymen qatar, Tashkent pen Núkis shaharlarynda ornalasqan iri óndirister alys aýmaqtarǵa kóshiriledi.
