Ózbekstan úkimeti sheteldik markadaǵy qyzmettik kólikterden bas tartyp jatyr

TAShKENT. KAZINFORM — Ózbekstannyń premer-mınıstri Abdýlla Arıpov «Mercedes-Benz» markaly qyzmettik kóligin otandyq «Malibu» temir tulparyna aýystyrdy, dep habarlaıdy Kazinform agenttiginiń menshikti tilshisi.

UZA aqparat agenttiginiń málimetinshe, Abdýlla Arıpov beıneselektorlyq keńes ótkizip, onyń barysynda Mınıstrler kabınetiniń tóraǵasy barlyq laýazymdy tulǵalarǵa sheteldik markadaǵy qyzmettik kólikterli paıdalanýdan bas tartýdy tapsyrdy.

— Prezıdent tapsyrma berdi, tıisinshe biz ony qaltqysyz oryndaýǵa mindettimiz. Maǵan sheteldik markadaǵy qyzmettik kólikterden bas tartýdy 20 naýryzdan nemese 1 sáýirden bastaý usynyldy. Degenmen prezıdent tapsyrmasy dereý oryndalýy tıis. Sondyqtan bul jumystar erte bastaldy, — dedi Abdýlla Arıpov keńeste.

Málim bolǵandaı, eldegi barlyq mınıstrlikter men vedomstvolar otandyq kólikterdi paıdalanýǵa kóshti.

Atap aıtqanda, premer-mınıstrdiń orynbasarlary qazir «Malibu» temir tulparyna otyrsa, oblys hokımderi «Tahoe» jáne «Traverse» jol talǵamaıtyn kólikterin paıdalanyp jatyr.

Sheneýnikterge jańa emes, qoldanystaǵy temir tulparlar berilýde. Al buǵan deıin paıdalanylyp kelgen sheteldik kólikter aýktsıon arqyly satylymǵa shyǵarylady.

Eske salaıyq, taıaýda Sybaılas jemqorlyqqa qarsy kúres jónindegi ulttyq keńeste sóz sóılegen Ózbekstan prezıdenti Shavkat Mırzıeev sheteldik qyzmettik kólikterdi paıdalanýdy qysqartyp, otandyq óndiristi qoldaýdy tapsyrǵan bolatyn.