Ózbekstan, Túrikmenstan: Túrki mádenıeti men murasy qoryna múshe elder sany artady
ASTANA. KAZINFORM – Astanada ótken Túrki mádenıeti men murasy qory keńesiniń II otyrysynda Aqtoty Raıymqulova jaqynda uıymǵa múshe elder qatary tolyǵatynyn habarlady.

- Qyrǵyz Respýblıkasynyń Bishkek qalasynda 2024 jylǵy 6 qarashada ótken Túrki memleketteri uıymy Memleket basshylary keńesiniń 11-sammıtinde Ózbekstan Respýblıkasynyń prezıdenti Shavkat Mırzıeev myrza óz sózinde Ózbekstan tarapynyń bizdiń Qordyń tolyqqandy múshesi bolýǵa daıyn ekendigin bildirdi. Qorǵa múshe memleketterdiń sanyn arttyrý – bizdiń qyzmetimizdegi basty strategııalyq baǵyttardyń biri ekendigin atap ótken jón, - dedi qor basshysy.
Sonymen qatar Aqtoty Raıymqulova Túrikmenstan memleketi dıplomatııalyq nota arqyly qorǵa baqylaýshy memleket retinde qosylýǵa daıyn ekendigin jetkizgenin atap ótti.

- Bul usynystar jan-jaqty pysyqtalýda, jaqyn arada atalǵan memleketterdi qorǵa múshe jáne baqylaýshy memleketter qatarynda kóremiz dep oılaımyz, - dedi ol.
Aıta keteıik, atalǵan otyrysty ashqan QR Mádenıe jáne aqparat mınıstri Aıda Balaeva Túrkistanda restavratorlar daıarlaýdy usyndy.
Buǵan deıin Astanadaǵy ulttyq mýzeıde «Dıýanı luǵat at-túrk» sózdiginiń 950 jyldyǵyna oraı halyqaralyq kórme ashylǵanyn jazǵan edik.