Ózbekstan Túrki memleketteriniń ónerkásiptik alıansyn qurýdy usyndy

TAShKENT. KAZINFORM – Ózbekstan prezıdenti Shavkat Mırzıeev Túrki memleketteri uıymynyń kezekti sammıtinde ekonomıka, ınvestıtsııa jáne gýmanıtarlyq saladaǵy yntymaqtastyqty nyǵaıtýǵa baǵyttalǵan birqatar bastama kóterdi, dep habarlaıdy Kazinform agenttiginiń menshikti tilshisi.

Sóz basynda Shavkat Mırzıeev halyqaralyq arenadaǵy uıym bedeliniń artyp kele jatqanyn atap ótip, naqty nátıjelerge toqtaldy.

- Uıym jumysy eń aldymen elderimiz arasyndaǵy saıası dıalog, ózara senim men jan-jaqty seriktestikti nyǵaıtýǵa yqpal etti. Tıisinshe, mańyzdy gýmanıtarlyq baǵdarlamalar iske asty. Búgingi tańda uıym aıasyndaǵy yqpaldastyq 35 baǵyt boıynsha damyp keledi. 2030 jylǵa TMU-ǵa múshe elder arasyndaǵy ózara saýda aınalymy eki ese ósýi múmkin ekenin boljap otyrmyz, - dedi Shavkat Mırzıeev.

Ózbekstan basshysy osy seriktestikti bekemdeı túsýdiń mańyzyn aıta kele, Túrki ınvestıtsııalyq qory aıasyndaǵy josparlardy kelisetin Ekonomıkalyq áriptestik jónindegi turaqty keńes qurý bastamasyn kóterdi.

- Bul qurylymdy premer-mınıstrlerdiń orynbasarlary basqarýy kerek dep esepteımiz. Ol format turaqty negizde jumys isteýi qajet. Biz keńestiń jobalyq keńsesin Tashkentte ornalastyrýǵa daıynbyz, - dep málim etti Shavkat Mırzıeev.

Kórshiles el prezıdentiniń sózinshe, atalǵan keńes aıasynda uıymǵa múshe memleketter birqatar jańa bastamalardy júzege asyra alady. Atap aıtqanda, ol Túrki memleketteriniń ónerkásiptik alıansyn qurý usynysyn zerdeleýmen aınalysady. Sondaı-aq, Shavkat Mırzıeev uıym aıasyndaǵy kólik-logıstıkalyq máselelerdi sheshý qajettigin aıtty. Ol úshin elder halyqaralyq tranzıt dálizderin damytý baǵytynda úılestirilgen saıasat júrgizýi mańyzdy.

- Biz Orta dálizdi damytý boıynsha usynylǵan barlyq jospardy tolyq qoldaımyz. Eń bastysy, bul dáliz básekege qabiletti bolýy tıis. Sonymen qatar ol bıznes qaýymdastyq úshin qolaıly jaǵdaı usyna alýy kerek. Osyǵan baılanysty ońtaıly tarıf qoldaný, kólik ınfraqurylymyn jetildirý jáne kedendik rásimderdi tsıfrlandyrýǵa baǵyttalǵan jobalarǵa mán beremiz, - dedi Ózbekstan basshysy.

Atalǵan bastamalarmen qatar, Shavkat Mırzıeev jasandy ıntellekt pen kreatıvti ekonomıkany damytý boıynsha da birqatar usynys aıtty.

- Osy baǵyttardaǵy kúsh-jigerimizdi biriktirý úshin «Jasandy ıntellekt jáne kreatıvti ekonomıka salasyndaǵy jobalardy iske asyrý jónindegi jol kartasyn» qabyldaýdy usynamyz. Sondaı-aq, Ózbekstanda Túrki áleminiń Halyqaralyq kórmesin ótkizý týraly bastama kóterip otyrmyz, - dep túıindedi Shavkat Mırzıeev.

Eske salaıyq, búgin Ázerbaıjannyń Gabala qalasynda Túrki memleketteri uıymyna múshe elder prezıdentteriniń 12-shi sammıti ótti. Oǵan qatysqan Memleket basshysy Qasym-Jomart Toqaev uıymnyń jumysyna serpin beretin tyń bastamalar kóterdi.