Ózbekstan týrıster úshin tirkeý protsedýrasyn jeńildetpek
TAShKENT. QazAqparat - Ózbekstanǵa keletin týrısterge eldiń ishki ister organdaryna tirkelý protsedýrasy jeńildeıdi, dep habarlaıdy «QazAqparat» HAA tilshisi.
Bul týraly týrızmdi damytýǵa arnalǵan vıdeoselektrlyq jınalys barysynda belgili boldy. Ózbekstan prezıdenti Shavkat Mırzıeev belgilengen merzimde elektrondyq vızalardy engizý, álemdik tájirıbeni zertteı otyryp osy júıeni ári qaraı ońtaılandyrý jáne sheteldik týrısterdiń kelý tártibin ońtaılandyrý týraly tapsyrma berdi.
Qazirgi zańnamaǵa sáıkes, Ózbekstanǵa kelgen týrıster 3 kúnniń ishinde turǵylyqty jeri boıynsha tirkelýi tıis.
«Týrıst ishki ister organdarynyń mekemelerine baryp júrý úshin emes, saıahattaýǵa keledi. Eger biz týrızmniń esebinen jumys oryndaryn ashqymyz kelse, týrısterge talap qoımaı, olardyń jaǵdaıyn jasaýymyz kerek», - dedi Ózbekstan prezıdenti.
Osyǵan baılanysty tirkeý júıesin tolyqtaı elektrondyq úlgige aýystyrý, sondaı-aq ishki ister organdaryna, qonaq úılerge, medıtsınalyq mekemelerge, jeke úılerge jáne týrısterdi qabyldaıtyn basqa da jeke jáne zańdy tulǵalarǵa tirkeý boıynsha mindetter júkteldi.
Eske salaıyq, 2017 jyly Ózbekstanǵa 2 mıllıon 700 myńǵa jýyq týrıst barǵan.
