Ózbekstan turǵyndarynyń 64 paıyzy ataýly kómekke muqtaj

TAShKENT. QazAqparat - Ózbekstandaǵy otbasylardyń 36 paıyzy áleýmettik turǵydan qalyptasqan degenimen, qalǵan 64 paıyzy ataýly kómekke muqtaj. Bul týraly el prezıdenti Shavkat Mırzıeev málim etti, dep habarlaıdy QazAqparat Ózbekstan basshysynyń baspasóz qyzmetine silteme jasap.

Úsh aı ishinde oblys basshylary 35,3 mıllıon adam turatyn 6,9 mln shańyraqtyń jaǵdaıyn zerttedi. Nátıjesinde olar tórt sanatqa bólindi: 11% - tabysy az otbasylar, 47% - turaqty tabysy bar, biraq qosymsha tabysqa muqtaj otbasylar, 6% - áleýmettik kómekti qajet etetinder, 36% - ekonomıkalyq jaǵdaıy jaqsy, aýqatty otbasylar.

«Jańa júıeniń arqasynda árbir ákim, onyń ekonomıka jónindegi birinshi orynbasary jáne kómekshileri halyqtyń 64 paıyzymen jumys isteýi kerektigin bildi», - dedi Shavkat Mırzıeev.

Tıisti organdar sanaq qorytyndysy boıynsha 736 myń azamatty jumyspen qamtamasyz etip, birinshi jáne ekinshi sanattaǵy otbasylardan 54 myń azamatty kásipkerlikke oqytqany atap ótildi. 50 myń otbasylyq bıznes jobasy júzege asyryldy. Osy maqsattarǵa 1,3 trln sým nesıe jáne 20 mlrd sým kóleminde sýbsıdııa bólindi.