Ózbekstan topyraǵyn joǵary deńgeıde tuz basqan álemdegi 10 eldiń qataryna endi

TAShKENT. KAZINFORM – «Ózbekǵarysh» agenttigi topyraǵy tuzdanǵan jerlerdi ǵaryshtan anyqtaý tájirıbesin jolǵa qoıady, dep habarlaıdy Kazinform agenttiginiń menshikti tilshisi.

- Bastapqy kezeńde Djızak oblysyndaǵy 90 egis alqabyna monıtorıng júrgiziledi. Onda spýtnıkten alynǵan sýretterge taldaý jasalyp, topyraqtyń tuzdylyq deńgeıi anyqtalady. Keıin derekter arnaıy ortalyqtarda zertteledi, - delingen «Ózbekǵarysh» agenttiginiń baspasóz qyzmeti taratqan habarlamada.

Vedomstvodan atap ótkendeı, monıtorıng nátıjesinde alynǵan derekter negizinde respýblıkadaǵy tuzdaný deńgeıi joǵary jerlerdiń statıstıkasy ázirlenedi. Keıin aqparat dıqandarǵa usynylady.

- Nátıjesinde aýyl sharýashyǵy maqsatyndaǵy jerdi paıdalaný kezinde resýrstardy eseppen bólip, jerdiń tuzdaný dárejesine qaraı tıisti sharalar qabyldaýǵa bolady, - dep málim etti agenttikten.

BUU-nyń byltyrǵy zertteýine sáıkes, Ózbekstan topyraq tuzdylyǵy joǵary álemdegi 10 eldiń qaratyna endi. «Ózbekǵaryshtyń» málimetinshe, respýblıka aýmaǵynda 1 746,6 myń gektar alqapty sortań tartqan. Onyń ishinde 65,2 myń gektarda tuzdylyq deńgeıi óte joǵary sanalady.

- Araldyń tartylýy nátıjesinde 5,5 mln gektardan astam jer tuzdylyq deńgeıi óte joǵary shólge aınaldy, - delingen habarlamada.

Eske salaıyq, keler jyly Ózbekstan Túrki memleketteri uıymyna múshe eldermen birlesip ǵaryshǵa spýtnık ushyrady.

Taıaýda kórshiles el ǵarysh keńistigin zertteýge baǵyttalǵan halyqaralyq shartqa qosylǵan edi.

Buǵan deıin habarlaǵanymyzdaı, Qazaqstan men Ózbekstan ǵarysh salasyndaǵy seriktestikti nyǵaıtýǵa nıetti.