Ózbekstan, Tájikstan jáne Qyrǵyz Respýblıkasy Azııa kýbogyn ótkizýge birlesken ótinim berdi

TAShKENT. KAZINFORM - Azııa fýtbol konfederatsııasy Azııa qurlyǵyndaǵy eń bedeldi fýtbol týrnıri – 2031 jylǵy Azııa kýbogyn ótkizýge úmitkerlerdi qarastyra bastady, dep habarlaıdy Kazinform Ózbekstan fýtbol assotsıatsııasyna silteme jasap.

Sońǵy jyldary Ortalyq Azııada fýtboldy damytý baǵytynda júrgizilgen reformalarǵa, jasalyp jatqan jaǵdaılarǵa, olardyń halyqaralyq arenadaǵy yqpalyna súıene otyryp, Ózbekstan, Tájikstan jáne Qyrǵyz Respýblıkasynyń fýtbol qaýymdastyqtary Azııa kýbogynyń joǵary deńgeıde ótetinine senim bildirip, birlesken kandıdatýrasyn ortaǵa saldy.

Búginde Ózbekstan kórshi eldermen birge bedeldi jarysty ótkizýge tolyqtaı daıyn. Tashkent, Namangan, Ferǵana, Qarshı sııaqty qalalardaǵy stadıondar halyqaralyq standarttarǵa sáıkestendirildi.

ÓFA baspasóz qyzmetiniń málimdeýinshe, Ortalyq Azııa, ádettegideı, óziniń qonaqjaılylyǵymen, kásibı kózqarasymen, fýtbolǵa degen adaldyǵymen jáne árıne, fýtbol jankúıerleriniń súıispenshiligimen búkil Azııanyń nazaryn aýdarýǵa daıyn.

Esterińizge sala keteıik: Ózbekstanda sońǵy jyldary 20 jáne 23 jasqa deıingi Azııa kýbogy men fýtzaldan álem chempıonaty joǵary deńgeıde uıymdastyryldy jáne bul jarystar aldaǵy bedeldi týrnırler aldyndaǵy úlken synaq bolyp tabylady.

Fýtzaldan Ózbekstanda ótken álem chempıonatynda Qazaqstan quramasy shırek fınalǵa shyqqan edi.