Ózbekstan Taıvanmen kelissózden soń DSU-nyń teń quqyly múshesi atanbaq

TAShKENT. KAZINFORM — Ózbekstan Dúnıejúzilik saýda uıymyna (DSU) qosylý úshin 30 normatıvtik-quqyqtyq aktini qabyldap, qosymsha taǵy 30-ǵa jýyq qujatty ázirledi, dep habarlaıdy Kazinform agenttiginiń menshikti tilshisi. 

Bul týraly DSU máseleleri jónindegi Ózbekstan prezıdentiniń arnaıy ókili Azızbek Ýrýnov málim etti. Resmı Tashkent byltyr 40-tan astam kelissóz júrgizip, EO, Qytaı, Reseı, Ulybrıtanııa, Shveıtsarııa, Kanada, Avstralııa jáne ózge de eldermen tıisti kelisimderge qol qoıdy.

— Ózbekstan Dúnıejúzilik saýda uıymyna qosylý boıynsha 33 elmen hattamaǵa qol qoıdy. Endi tek Taıvanmen kelissózdi aıaqtaý qaldy, — dep málim etti Azızbek Ýrýnov.

Ol atap ótkendeı, Ózbekstan bul protsesti bıyl naýryzda Kamerýnda ótetin DSU mınıstrler konferentsııasynyń 14-shi otyrysyna deıin aıaqtaýǵa nıetti.

Buǵan deıin habarlaǵanymyzdaı, Ózbekstan DSU-ǵa qosylý kelissózderin 2025 jyly qorytyndylaýdy josparlaǵan.

Eske salaıyq, DSU-ǵa qosylý boıynsha ózbek tarapy 2024 jyly AQSh jáne Qytaımen arada ótken kelissózderge núkte qoıdy.