Ózbekstan Taıaý Shyǵys elderinen 9,3 myńnan astam otandasyn evakýatsııalady

TAShKENT. KAZINFORM – 1 naýryzdan beri eldiń Syrtqy ister mınıstrligi Taıaý Shyǵys memleketterinen 9 361 ózbekstandyqty evakýatsııalady, dep habarlaıdy Kazinform agenttiginiń Tashkenttegi menshikti tilshisi.

Vedomstvonyń málimetinshe, Saýd Arabııasynan – 8 114, Birikken Arab Ámirlikterinen – 1 192, Irannan – 23, Bahreınnen – 25 jáne Omannan 7 Ózbekstan azamaty elge oraldy.

– Qazirgi ýaqytta evakýatsııa negizinen áýe keńistigi azamattyq avıatsııa úshin ashyq turǵan elder arqyly júrgizilip jatyr, - dep atap ótti mınıstrlikten.

Ózbek tarapy aımaqtaǵy ózge memleketterdiń áýe keńistigi ashylǵan ýaqytta evakýatsııalyq is-sharalardy jalǵastyrady.

Eske salaıyq, 3 naýryzda Irandaǵy 13 ózbekstandyq Túrikmenstan arqyly Otanyna oraldy.

Buǵan deıin habarlaǵanymyzdaı, Ózbekstan Taıaý Shyǵystaǵy shıelenistiń iri qaqtyǵysqa ulasýyna alańdaýly.

Keshe Ózbekstan prezıdenti Shavkat Mırzıeev Taıaý Shyǵystaǵy qaqtyǵysqa baılanysty jaýapty mınıstrlikke eldiń qorǵanys áleýetin nyǵaıtýdy tapsyrdy.

28 aqpanda Prezıdent Qasym-Jomart Toqaev Qaýipsizdik Keńesiniń Hatshysy Ǵızat Nurdáýletovke Taıaý Shyǵystaǵy ahýaldyń shıelenisýine baılanysty qaýipsizdik jóninde tapsyrma berdi.

Sondaı-aq 4 naýryzda Memleket basshysy Qasym-Jomart Toqaev kúshtik qurylymdarǵa ınfraqurylym qaýipsizdigin baqylaýdy tapsyrdy.