Ózbekstan táýelsizdiginiń 31 jyldyǵyn atap ótti
TAShKENT. QazAqparat – Ózbekstanda eldiń basty ulttyq merekesi – Táýelsizdik kúni toılandy. Bıyl respýblıka táýelsizdiktiń 31 jyldyǵyn atap ótti, dep habarlaıdy QazAqparat menshikti tilshisi.
Ózbekstan Prezıdenti Shavkat Mırzıeevtiń qatysýymen merekelik is-shara byltyr respýblıkanyń mereıtoıyna arnaıy salynǵan «Jańa Ózbekstan» saıabaǵynda ótti.
«Jyldar, ǵasyrlar ótedi. Biraq, bizdiń ulttyq memlekettiligimizdi, bolmysymyzdy jáne adamı quqyǵymyzdy qalpyna keltirgen Táýelsizdik kúni – barlyq jetistigimiz ben belesimizdiń negizi. Biz úshin, bizdiń bolashaq urpaǵymyz úshin árqashan eń uly jáne qymbat mereke bolady», - tdedi Shavkat Mırzıeev saltanatty sózinde.
Óz sózinde Ózbekstan basshysy aldaǵy bes jylda el damýynyń basty baǵyttaryna aınalatyn bes basymdyqty atap ótti.
Birinshiden, bilim berý salasynda zamanaýı bilim men daǵdylardy alý úshin barynsha qolaıly jaǵdaı jasalady. Osy maqsatta mektep baǵdarlamalary, oqytý ádistemesi, oqýlyqtardyń mazmuny túbegeıli qaıta qaralady.
Ekinshiden, kez kelgen daýly máseleniń ádil sheshimin tek sot tabýy kerek. Sýdıalardyń jumysyna aralasý qatań jazalanady, olardyń esh kedergisiz jumys isteýi úshin barlyq qajetti jaǵdaılar jasalatyn bolady.
Úshinshiden, bıznesti damytý esebinen qosymsha jumys oryndary ashylyp, kedeıshilik azaıady, halyqtyń tabysy artady. Bul úshin jekemenshik pen kásipkerlik jolyndaǵy barlyq kedergiler joıylady. Memlekettik basqarý reformalanady, al memlekettiń ekonomıkaǵa qatysýy kúrt qysqarady.
Tórtinshiden, densaýlyq saqtaý júıesinde halyqtyń neǵurlym sapaly jáne bilikti medıtsınalyq qyzmetterge qoljetimdiligi keńeıtiletin bolady. Adamdarǵa medıtsınalyq qyzmetter qoljetimdi bolý úshin barlyq aımaqtarda jedel medıtsınalyq kómek kórsetý kólemi artady.
Besinshiden, halyqty taza aýyz sýmen qamtamasyz etý máselesi basty nazarda bolady. Salaǵa quıylatyn ınvestıtsııa kólemi kúrt kóbeıtiledi.
«Ózbekstan Respýblıkasynyń memlekettik táýelsizdigin jarııalaý týraly» qaýly 1991 jyly 31 tamyzda Ózbekstan KSR Joǵarǵy keńesiniń kezekten tys sessııasynda qabyldanǵan. Sol qujatqa sáıkes, 1 qyrkúıek – Ózbeksatnnyń táýelsizdigi kúni bolyp jarııalandy.
