Ózbekstan sýarý maýsymynyń sońyna deıin Qazaqstanǵa taǵy 500 mln tekshe metr sý jiberedi
ASTANA. KAZINFORM — QR Sý resýrstary jáne ırrıgatsııa mınıstrligi Ózbekstan sýarý maýsymynyń sońyna deıin Qazaqstanǵa taǵy 500 mln tekshe metr sý jiberetinin málimdedi.
Aıta keteıik, Sý resýrstary jáne ırrıgatsııa mınıstri Nurjan Nurjigitov pen Ózbekstannyń Sý sharýashylyǵy mınıstri Shavkat Hamraev eki el prezıdentteriniń kezdesýine qatysty.
1 sáýirden beri ózbek tarapy elimizge Syrdarııa ózeni arqyly 4 mlrd tekshe metrden astam sý jibergen bolatyn. Osyǵan deıin Sý resýrstary jáne ırrıgatsııa mınıstri Nurjan Nurjigitov Ózbekstanmen jarty jyl ishinde Qazaqstanǵa Syrdarııa ózeni arqyly 3,7 mlrd tekshe metr sý jiberý týraly mámilege kelgen. Nátıjesinde ózbek tarapy kelisilgen sý kólemin 4 aıda jiberdi.
Bul jumystardyń barlyǵy elimizdiń ońtústik óńirlerindegi sharýalardyń sýarmaly sýǵa suranysyn tolyq qanaǵattandyrý úshin jasalyp jatyr. Búgingi tańda Shardara sý qoımasynda 1.5 mlrd tekshe metr sý bar, bul ótken jylmen salystyrǵanda shamamen 500 mln tekshe metrge artyq. Shardara sý qoımasyna jalpy kólemi 4 mlrd tekshe metr sý keldi.
Shardara sý qoımasynan Syrdarııa ózeniniń tómengi aǵysyna 4,5 mlrd tekshe metr sý jiberildi. Bul byltyrǵy kórsetkishke qaraǵanda 1 mlrd tekshe metrge artyq. Qyzylqum kanalyna 850 mln tekshe metr sý, al 590 mln tekshe metr Soltústik Aral teńizine jiberildi.
«Kórshilerimizben Toqtoǵul jáne Bahrı-Tochık sý qoımalarynyń jumys kestesin aldyn ala kelisýdiń nátıjesinde «Dostyq» memleketaralyq kanalynyń qazaqstandyq bóligine sý turaqty túrde kelip jatyr. Qazir atalǵan kanal arqyly elimizge sekýndyna 90 tekshe metr sý keledi. Bul Túrkistan oblysynyń sharýalaryn sýarmaly sýmen tolyq qamtamasyz etý úshin jetkilikti», - dedi Sý resýrstary jáne ırrıgatsııa mınıstrliginiń resmı ókili Móldir Ábdýalıeva.
