Ózbekstan SІM basshysy Mırzıeevtiń Qazaqstanǵa memlekettik saparyn tabysty dep atady
TAShKENT. QazAqparat - Ózbekstan Respýblıkasy Olıı Majlıs Senatynyń 10-shy jalpy otyrysynda Ózbekstan syrtqy ister mınıstri Abdýlazız Kamılovtyń esebi alǵash ret tyńdaldy, dep habarlady «QazAqparat» HAA tilshisi.
Abdýlazız Kamılov óz sózin esepti kezeńde qol jetkizgen jetistikterinen bastady.
«Ótken jylǵy qyrkúıekten bastap qazirgi ýaqyt aralyǵynda joǵary deńgeıdegi 12 sapar uıymdastyryldy. Ózbekstan Respýblıkasy Prezıdentiniń Túrikmenstanǵa, Qazaqstanǵa, Reseı men Qytaıǵa memlekettik sapary tabysty boldy, onyń nátıjesi boıynsha $37,7 mlrd somasynda 239 shartqa jáne kelisimderge qol qoıyldy», - dedi syrtqy ister mınıstri.
Tutastaı, ótken 9 aıda jasalǵan saýda-ınvestıtsııalyq kelisimsharttar sany 320-dan astam bolyp, jalpy somasy $44 mıllıardty qurady. Olardyń tolyq aýqymda iske asyrylýyn qamtamasyz etý maqsatynda 13 elmen praktıkalyq is-qımyl josparlary bekitildi.
Otandyq taýarlardyń eksportyn keńeıtý maqsatynda shetel mekemeleri ulttyq kompanııalarǵa taıaý jáne alys shetelge jemis-kókónis jáne toqyma ónimderin, qurylys materıaldaryn, avtomobıl, aýyl sharýashylyǵy, elektr-turmystyq tehnıka jetkizýge kelisimshart jasasýǵa, Reseı, Qazaqstan, Ýkraına, Pákistan, Aýǵanstan jáne t.b. birqatar elderde ózbek kásiporyndarynyń saýda úılerin ashýǵa járdemdesti, dep toqtalyp ótti óziniń alǵashqy esebinde Abdýlazız Kamılov.
