Ózbekstan sheteldikter úshin «altyn vıza» engizýdi josparlap otyr

TAShKENT. KAZINFORM – Ózbekstanda 1 maýsymnan bastap shetel azamattary men azamattyǵy joq adamdarǵa bes jyl merzimge turýǵa ruqsat alýdyń ońtaılanǵan tártibi engiziledi. Bul norma prezıdenttiń 18 sáýirdegi jarlyǵynda bekitilgen, dep habarlaıdy Gazeta.uz respýblıkanyń Ádilet mınıstrligine silteme jasap.

– Qujatty alý úshin ótinish berýshi 200 myń AQSh dollaryn, sondaı-aq otbasynyń árbir múshesi – jubaıy, balalary men ata-anasy úshin 100 myń dollardan tóleýi kerek, – delingen habarda.

Respýblıka bıligi osylaısha elge jańa ınvestıtsııa tartýǵa úmitti.

Elde turý yqtııarhaty – azamattyǵy joq adamnyń nemese shet memleket azamatynyń jeke basyn kýálandyratyn, Ózbekstan Respýblıkasynyń aýmaǵynda turaqty turýǵa ruqsatty rastaý úshin beriletin qujat.

18 sáýirde Ózbekstan prezıdenti Shavkat Mırzıeev bıznes úshin salyq jeńildikterin engizý týraly jarlyqqa qol qoıdy. Sondaı-aq, prezıdent jarlyǵymen shetel azamattary men azamattyǵy joq adamdarǵa turaqty turýǵa ruqsat berý týraly anyqtamany aqyly túrde berýdi jeńildetý qarastyrylǵan.

Aıta keteıik, Ózbekstan SpaceX kompanııasymen birlesip ǵaryshqa óz spýtnıgin ushyrmaq.