Ózbekstan sheteldik ınvestorlardy dıvıdend salyǵynan bosatady
TAShKENT. KAZINFORM – Ózbekstanda sheteldik ınvestorlar úshin jańa salyqtyq jeńildik engiziledi. Bul týraly ІІІ Tashkent ınvestıtsııalyq forýmynda el prezıdenti Shavkat Mırzıeev málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ózbekstan ınvestorlarǵa dıvıdend tabysynyń 10 paıyzy mólsherinde salynatyn salyqty alyp tastamaq. Atap aıtqanda, bul eldiń ekonomıkasyna qarjy quıýǵa nıetti sheteldikter 3 jyl merzimge tıisti mindettemeden bosatylady.
«Kásipkerlik pen bıznesti qoldaý maqsatynda biz naqty sharalar ázirledik. Endi sheteldik ınvestorlar aktsııalardan alynǵan dıvıdendter boıynsha salyqtan 3 jyl merzimge bosatylady», - dedi Shavkat Mırzıeev.
Sondaı-aq Ózbekstan basshysy sheteldik ınvestorlar úshin jerdi jalǵa alý merzimin 49 jylǵa deıin uzartý jóninde qarar qabyldanǵanyn atap ótti. Buǵan deıin jalǵa berý ýaqyty 25 jyldan aspaıtyn.
«El prezıdenti aıtqan bastamalar óte mańyzdy. Sebebi álemde tikeleı sheteldik ınvestıtsııa úshin talas kúsheıgen. Ózbekstannyń bul turǵyda óziniń basym tustary bar. Ol – jumysqa qabiletti jastardyń kóptigi. Bul bıznesti yntalandyratyn kúsh, oǵan qosymsha salyqtyq jeńildikter berilse, ınvestorlar úshin jaqsy múmkindik bolar edi», - dedi Ózbekstannyń jobalyq seriktesi Endrıý Haıes.
Bulardan bólek, joǵary reıtıngige ıe kásipkerlik qurylymdarǵa salyqtyq tekseris júrgizilmeıdi. Mundaı ózgeristiń jergilikti bızneske oń yqpaly zor.
Aıta keteıik, Ózbekstanda qazaqstandyq kapıtalmen jumys isteıtin 1,1 myńnan astam birlesken kásiporyn bar.
«Memleket basshylary júktegen tapsyrmaǵa saı, ózara yntymaqtastyqty odan ári nyǵaıtýǵa kúsh salamyz. Eger tikeleı ınvestıtsııa jaıynda aıtar bolsaq, keıingi 10 jylda Ózbekstannan Qazaqstan naryǵyna 33 mln dollar qarjy baǵyttalǵan. Al keri baǵytta kórsetkish kóbirek. Qazaqstan Ózbekstanǵa osy ýaqyt aralyǵynda 401 mln dollar ınvestıtsııa quıdy. Bul degenimiz arada áli tolyq ashylmaı otyrǵan áleýetimiz bar ekenin kórsetedi», - dedi ınvestıtsııalyq forýmǵa qatysqan QR Syrtqy ister mınıstriniń orynbasary Nazıra Nurbaeva.
Forým barysynda Qazaqstannyń ınvestıtsııalyq ahýaly da sóz boldy. Elimiz ekonomıkaǵa tikeleı qarjy tartý jóninen kóp memleketten ilgeri tur. Máselen, Ózbekstannyń metallýrgııalyq prokat daıyndaý isindegi iri kásiporny elimizde quny 70 mln dollar bolatyn jańa jobany júzege asyrýdy kózdep otyr.
«Qazir bul joba boıynsha Qazaqstannyń elshiligi jáne Ónerkásip mınıstrligimen kelissóz júrip jatyr. Joba quny 70 mln dollar dep belgiledik. Biraq kólemi odan da ulǵaıýy múmkin. Áýeli óndiristi qaı óńirde salatynymyzdy anyqtap alýymyz kerek. Sosyn onyń ónimi jergilikti jáne kórshi el naryǵy men Eýropaǵa eksporttalady», - dep bólisti ózbekstandyq metallýrgııa kompanııasynyń jobalyq jetekshisi Gıýzal Tojımırzaeva.
Qazaqstan men Ózbekstan arasyndaǵy ınvestıtsııalyq yntymaqtastyq keıingi jyldary qarqyndy damyp keledi. Jalpy quny 2,5 mlrd dollardan asatyn 60 óndiristik joba qolǵa alynǵan. Onyń ishinde, dástúrli aýyl sharýashylyǵy men shıkizat óndirisinen bólek jańa salalar da bar. Máselen, ózbekstandyq bıznes elimizde jeńil ónerkásippen aınalysyp, turmystyq tehnıka jasaýǵa kirisse, qazaqstandyq kásipkerler kórshi memlekette zamanaýı turǵyn úı keshenderin salyp, dılerlik ortalyqtar ashýǵa den qoıǵan.
