Ózbekstan shekarasyn buzǵan 24 aýǵanstandyq ustaldy

TAShKENT. QazAqparat – Ózbekstan shekarasyn buzǵan mııa tamyryn zańsyz terýmen aınalysqan 24 aýǵan azamaty ustaldy, dep habarlaıdy QazAqparat menshikti tilshisi.

21 tamyzda Aral Paıǵambar aralynyń aýmaǵynda Ózbekstannyń Sýrhandarııa oblysyndaǵy Ámýdarııa ózeninde memlekettik shekarany buzǵan jáne óz qaıyqtaryn aralǵa ákelgen Aýǵanstan azamattary anyqtalǵan. Olar Ózbekstan shekara otrıadyna qarsylyq kórsetken.

«Júrgizilgen operatsııanyń arqasynda olardyń kim ekenin anyqtap, tergeý sharalaryn júrgizý úshin Ózbekstannyń memlekettik shekarasyn buzǵandardyń barlyǵy (olardyń sany - 24) ustaldy», - dep habarlady shekara qyzmeti.

Tergeý nátıjeleri boıynsha Aýǵanstan azamattarynyń aralǵa kelýine Ózbekstannyń shekaralyq aımaǵynda kóptep ósetin mııa tamyryn zańsyz óndirý sebep bolǵany anyqtaldy.