Ózbekstan shekarasynda áıel nemeresin zańsyz tasymal úshin paıdalanǵan

TAShKENT. KAZINFORM – Ózbekstandyq kedenshiler Qazaqstanmen shekaradaǵy «Málik» ótkizý pýnkti arqyly ózbek tarapyna altynnan jasalǵan zergerlik buıymdardyń iri partııasyn alyp ótpek bolǵan áıeldi anyqtady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan Keden komıtetiniń baspasóz qyzmetinen málim etkendeı, shekara beketi arqyly ótpek bolǵan áıeldi tekserý kezinde onyń aıaǵyna oralǵan 19 qaptama tabyldy. Onyń ishine gaýhar tastarmen bezendirilgen ári baǵaly metaldardan jasalǵan 468 zergerlik buıym jasyrylǵan.

Anyqtalǵan áıel 14 jastaǵy nemeresin de zańsyz tasymal úshin paıdalanǵan. Kámeletke tolmaǵan qyzdy tekserý barysynda odan 454 zergerlik buıym jasyrylǵan 12 qaptama tabyldy.

Jalpy sany 922 áshekeıdiń salmaǵy 6,7 keliden asady, al olardyń quny - 5,6 mlrd sým (shamamen 213,8 mln teńge).