Ózbekstan Senaty Qazandaǵy jaǵdaıǵa baılanysty «Qarý týraly» zańdy qaraýdy keıinge qaldyrdy
Bul týraly QazAqparat tilshisi Ózbekstan Parlamentiniń Joǵarǵy palatasyna silteme jasap habarlaıdy.
Senat habarlamasynda plenarlyq otyrysta senatorlar jergilikti jerlerde jaǵdaıdy zerdeleý barysynda birqatar júıeli problemalardyń týyndaýyna baılanysty «Qarý týraly zańǵa tolyqtyrýlar men ózgerister engizý týraly» zańyn jetildirý qajet dep sheshti.
«Osy ýaqytqa deıin qarý ustaýǵa ruqsat etilmeıtin aýrý túrleriniń tizimi bekitilmegen. Azamattardyń qarý ustaýyna shekteý qoıylǵanymen shekten tys spırtti ishimdik iship, esirtki tutynýshylar da qarý ustaýǵa ruqsat ala alady»,-dep málimdedi depýtattar.
Sonymen qatar qarý ıeleriniń medıtsınalyq shekteýler boıynsha, sondaı-aq qarý ıelerimen birge turyp jatqan adamdardyń psıhıkalyq jaǵdaıy, spırtti ishimdikterdi shekten tys paıdalaný men esirtki tutynatynyna turaqty tekserý tetigi joq.
«Bul faktilerdiń barlyǵy qaıǵyly jaǵdaıdyń bolýyna yqpal etýi múmkin. Buǵan qarý men onyń oq-dárilerimen baılanysty álemde bolyp jatqan oqıǵalardy úlgi retinde kórsetýge bolady. Olardyń arasynda keshe ǵana Reseı Federatsııasyna qarasty Qazan qalasynda bolǵan oqıǵa da úlgi»,-dedi Senat depýtattary.
Plenarlyq otyrystyń qorytyndysy boıynsha, Ózbekstan Senaty atalmysh zań retteıtin qoǵamdyq qatynastardyń máni men mańyzyna ekpin túsire otyryp, anyqtalǵan problemalarǵa keshendi taldaý júrgizý «Qarý týraly» zań men ózge de zańnamalardy túbegeıli jetildirý maqsatynda zań jobasyn áli pysyqtaý qajet degen sheshimge keldi.
Mádıbek Jánibekov