Ózbekstan Senaty ózbek álipbıine ózgerister engizýdi maquldady
ASTANA. KAZINFORM — Ózbekstan Senaty latyn grafıkasyna negizdelgen ózbek álipbıine ózgerister engizýdi kózdeıtin zańdy maquldady. Endi álipbı qoldanystaǵy 26 árip pen úsh árip tirkesiniń ornyna 28 árip jáne bir apostrof belgisinen turady, dep habarlaıdy Kazinform agenttigi UzA-ǵa silteme jasap.
«Latyn grafıkasyna negizdelgen ózbek álipbıin engizý týraly» Ózbekstan Respýblıkasynyń zańyna ózgerister engizýdi kózdeıtin qujat Senattyń jalpy otyrysynda qaraldy.
Qujatty tanystyrǵan Senattyń ǵylym, bilim jáne densaýlyq saqtaý máseleleri jónindegi komıtetiniń tóraǵasy Odıljon Mamatkarımov elde ózbek tilin damytýǵa jáne onyń memlekettik til retindegi mártebesin nyǵaıtýǵa baǵyttalǵan sharalar qabyldanyp jatqanyn atap ótti.
Ózgeristerge sáıkes, ózbek álipbıi qazirgi 26 árip pen úsh árip tirkesiniń ornyna 28 árip pen bir apostrof belgisinen turady.
Bul rette buryn rásimdelgen qujattardy jańartylǵan álipbıge baılanysty qaıta aýystyrý qajet bolmaıdy. Zań kúshine engenge deıin berilgen qujattar óz kúshin saqtaıdy. Ulttyq valıýta men baǵaly qaǵazdar da aınalymda qala beredi.
Qoldanystaǵy álipbımen jazylǵan mańdaıshalar, kórsetkishter jáne memlekettik organdar men uıymdardyń jekelegen belgilerin fızıkalyq tozǵanǵa deıin nemese belgilengen paıdalaný merzimi aıaqtalǵansha qoldanýǵa ruqsat etiledi.
Talqylaý barysynda senatorlar jańa áripterdi engizý kezinde týyndaýy múmkin tehnıkalyq qıyndyqtardy da kóterdi.
Tsıfrlyq tehnologııalar mınıstriniń keńesshisi Nýrıllo Abdýllaev qazirgi ýaqytta biryńǵaı tehnıkalyq standart ázirlenip jatqanyn, aqparattyq derekqorlarǵa aýdıt júrgizilip, álipbıdegi ózgeristerdi eskere otyryp izdeý júıeleri jetildirilip jatqanyn aıtty.
Senattyń málimetinshe, zań latyn grafıkasyna negizdelgen ózbek álipbıi men emle erejelerin jetildirýge, memlekettik tildi qoldaný múmkindikterin keńeıtýge jáne ony odan ári tsıfrlandyrýǵa baǵyttalǵan.
Eske salaıyq, buǵan deıin Ózbekstannyń Zań shyǵarý palatasy (parlamenttiń tómengi palatasy) latyn qaripine negizdelgen ózbek álipbıine ózgeris engizý týraly zańdy qabyldap, qujatty Senatqa joldaǵanyn habarlaǵanbyz.
