Ózbekstan Senaty Qazaqstanmen odaqtastyq qatynas týraly shartty ratıfıkatsııalady

Ózbekstan Olıı Májilisiniń Senaty Qazaqstanmen odaqtastyq qatynas týraly shartty ratıfıkatsııalaıtyn zańdy maquldady, dep habarlaıdy Kazinform agenttiginiń menshikti tilshisi.

Ózbekstan Senatynyń baspasóz qyzmeti taratqan aqparatqa saı, 25 qarashada ótken kezekti jalpy otyrys sheńberinde «Ózbekstan Respýblıkasy men Qazaqstan Respýblıkasy arasyndaǵy odaqtastyq qatynastar jónindegi shartty ratıfıkatsııalaý» týraly zań qaralǵan. 

Talqylaý barysynda senatorlar Ózbekstan men Qazaqstannyń jaqyn kórshiler ekenin jáne uzaq ýaqyt boıy strategııalyq áriptes bolyp kele jatqanyn atap ótti.

Sońǵy jyldary eki el arasyndaǵy yntymaqtastyqtyń jańa dáýiri bastaldy.

Atap aıtqanda, saıası, saýda-ekonomıkalyq, mádenı-gýmanıtarlyq jáne basqa salalardaǵy baılanys qarqyndy damyp keledi.

Maquldanǵan shart syrtqy saıasat, qorǵanys jáne qaýipsizdik, kóshi-qon, ónerkásiptik kooperatsııany damytý, transshekaralyq sý resýrstaryn utymdy paıdalaný jóninde birlesken sharalar qabyldaý, parlamentter, saıası partııalar men qoǵamdyq uıymdar arasyndaǵy baılanystardy nyǵaıtýǵa baǵyttalǵan ózara is-qımyldar keshenin qamtıdy.

«Shartty ratıfıkatsııalaý eki halyqtyń rýhanı jáne mádenı jaqyndyǵyn nyǵaıtýǵa, mádenıet, ǵylym, bilim jáne sport salasyndaǵy ózara qarym-qatynastardy ilgeriletýge qyzmet etedi», - delingen Senattyń baspasóz qyzmeti taratqan habarlamada.

Eske salaıyq, Qasym-Jomart Toqaev pen Shavkat Mırzıeev odaqtastyq qatynastar týraly shartqa byltyr 22 jeltoqsanda Tashkentte qol qoıǵan bolatyn.