Ózbekstan sáýirdiń sońyna deıin reseılik «Spýtnık V» vaktsınasynyń 300 myń dozasyn alady
TAShKENT. QazAqparat – Reseılik «Spýtnık V» vatsınasynyń alǵashqy 300 myń dozasy Ózbekstanǵa sáýir aıynyń sońyna deıin jetkiziletin bolady, dep habarlaıdy QazAqparat tilshisi Ózbekstan Respýblıkasynyń Densaýlyq saqtaý mınıstrliginiń baspasóz qyzmetine silteme jasap.
Bul týraly búgin ótken Koronavırýspen kúres jónindegi respýblıkalyq komıssııanyń keńeıtilgen otyrysynda Ózbekstan Respýblıkasynyń premer-mınıstri Abdolla Áripov málimdedi.
«Osy aıdyń sońyna deıin reseılik «Spýtnık V» vatsınasy vaktsınalaýǵa qosylady. Elge jetkiziletin «Spýtnık V» vatsınasynyń alǵashqy kólemi 300 myń dozany quraıdy», - dedi A.Áripov.
Úkimet basshysy Ózbekstan bastapqyda ártaraptandyrý jáne qaýipsizdikti qamtamasyz etý úshin birneshe vaktsına satyp alýdy josparlaǵanyn atap ótti.
«Bizdiń strategııamyzǵa sáıkes biz bastapqyda úsh vaktsınany josparladyq. Aıdyń aıaǵynda Qytaı vaktsınasynyń taǵy 1 mıllıon dozasy jetkiziledi dep kútilýde. Shart jasaldy, aqsha tólendi, barlyq máseleler, sonyń ishinde reıster anyqtaldy. Eger bireýi jetkize almasa, kelesi biri jetkizedi», - dep málimdedi Ózbekstan Premer-mınıstri.
Eske sala keteıik, Ózbekstanda koronavırýsqa qarsy jappaı vaktsınalaý 1 sáýirde bastaldy. Eki apta ishinde 300 myńnan astam adamǵa ekpe salynǵan. Halyqty vaktsınalaý sáýirde iri qalalarda, mamyrda aýdan ortalyqtary men shaǵyn qalalarda, maýsym aıynda aýyldyq jerlerde júredi. Vaktsınatsııa eki preparatpen, eýropalyq AstraZeneca vaktsınasymen jáne ZF-UZ-VAC2001 qytaı-ózbek vatsınasymen júrgizilýde.
Avtor: Mádibek Jánibekov
