Ózbekstan Sardoba sý qoımasyn qalpyna keltirý josparyn Qazaqstanmen kelisip bekitedi
Bul týraly Ekologııa, geologııa jáne tabıǵı resýrstar mınıstriniń orynbasary Serik Qojanııazov redaktsııanyń saýalyna joldaǵan jaýabynda aıtty.
«Sardoba máselesi boıynsha Qazaqstan Respýblıkasy men Ózbekstan Respýblıkasy arasynda mınıstrler deńgeıinde tórt ret, (14 mamyr Shymkent, 2-3 shilde Tashkent) onyń ishinde eki ret onlaın ekijaqty otyrysy ótkizildi. Ekologııa, geologııa jáne tabıǵı resýrstar mınıstri M.M.Myrzaǵalıevpen Ózbekstan Respýblıkasy Sý sharýashylyq mınıstri Sh.R. Hamraevtyń Shymkent qalasyndaǵy kezdesý kezinde (2020 jylǵy 14 mamyr) taraptar halyqaralyq sarapshylardy tarta otyryp, Sardoba sý qoımasyna tehnıkalyq aýdıt júrgizýge kelisti.
Alaıda 2020 jyly Covid-19 pandemııasyna baılanysty tehnıkalyq aýdıt júrgizý múmkin bolmady» delingen jaýapta.
Degenmen, bul jumys bıyl aqpan aıynda atqaryldy.
Endi Ózbekstan taraby osy aýdıt qorytyndysyn negizge alyp, sý qoımasyn qalpyna keltirý jobasynyń tehnıkalyq-ekonomıkalyq negizdemesin daıyndaıdy.
Ol qujatty Qazaqstan taraby maquldaǵannan keıin ǵana iske asyrýǵa kirisedi.
«Aǵymdaǵy jyldyń 17-21 aqpan aralyǵynda Qazaqstan men Ózbekstan sarapshylary birlesip Sardoba sý qoımasyna tehnıkalyq aýdıt júrgizdi. Tehnıkalyq aýdıt qorytyndysy boıynsha taraptar aktige qol qoıdy. Sardoba sý qoımasyn qalpyna keltirý boıynsha aldymen tehnıkalyq-ekonomıkalyq negizdeme ázirlenedi. TEN ázirlengennen keıin ózbek tarapy ony qazaqstan tarapymen kelisýge mindettenip otyr» deıdi vıtse mınıstr óz jaýabynda.
