Ózbekstan rezervterindegi altyn qorynyń quny rekordtyq deńgeıge jetti

ASTANA. KAZINFORM — Ózbekstan Ortalyq bankiniń málimetinshe, shilde aıynda Ózbekstannyń altyn-valıýta rezervteri 48,74 mıllıard dollarǵa deıin ósti. 

Bul ótken aımen salystyrǵanda 193,7 mln dollarǵa(0,4%) kóp. Jyl basynan beri eldiń «qarjylyq qaýipsizdik jastyǵy» 7,56 mlrd dollarǵa (+18,4%) ósti.

Rezervterdegi altynnyń fızıkalyq kólemi 20 myń troıa ýntsııasyna (0,6 tonna) azaıyp, 11,7 mıllıon troıa ýntsııasyn (363,9 tonna) qurady.

Soǵan qaramastan, altyn rezervteriniń quny 38,68 mlrd dollarǵa deıin ósti, bul 2013 jyldan bergi rekordtyq kórsetkish sanalady. Maýsym aıyndaǵy kórsetkishten 265 mln dollarǵa artyq.

Bul ósim altynnyń baǵasy shamamen 0,2%-ǵa ósip, 3 338,6 dollardan 3 346,5 dollarǵa deıin kóterilgen kezde oryn aldy.

Valıýta rezervteri 63,3 mln dollarǵa azaıyp, 9,5 mlrd dollarǵa jetti, bul aqpan aıynan bergi eń tómen kórsetkish bolyp tur.

Ortalyq banktiń bir aı ishinde satyp alǵan baǵaly qaǵazdarynyń quny da ósti. 1 tamyzdaǵy jaǵdaı boıynsha bul kórsetkish 1,01 mlrd dollardy qurap, bir aıda 303 mıllıon dollarǵa (+42,7%) ósti.

Rezervterr quramyndaǵy altynnyń úlesi joǵary – 79,4% (bir jyl buryn bul kórsetkish 77,9% bolǵan). Aktsııalar men oblıgatsııalardyń úlesi 2%-dan, valıýtalyq rezervterdiń úlesi 19,5%-dan asty.

Eske sala keteıik, maýsym aıynda Ózbekstannyń altyn-valıýta qory 1,1 mlrd dollarǵa qysqardy.