Ózbekstan Reseıden gaz ımportyn arttyrý úshin 500 mıllıon dollar jumsaıdy

TAShKENT. KAZINFORM – Ózbekstan úkimeti Reseıden gaz tasymaldaý júıesin jańǵyrtýǵa 500 mıllıon dollar bólýdi josparlap otyr. Maqsat – tabıǵı gaz ımpotyn 9 mıllıon tekshe metrden 32 mıllıon tekshe metrge jetkizý.

«Ýztransgaz» soltústikten ákelinetin tabıǵı gaz kólemin ulǵaıtý úshin magıstraldyq gaz júıesin jańǵyrtý baǵdarlamasyn júzege asyrýda. Bul úkimettiń «2024 jyldyń birinshi toqsanyna arnalǵan ınvestıtsııalyq baǵdarlamany iske asyrý jónindegi sharalar týraly» qaýlysynda qarastyrylǵan.

2024-2030 jyldardaǵy birinshi kezeńde tabıǵı gaz tasymalyn táýligine 32 mıllıon tekshe metrge deıin jetkizý josparlanyp otyrǵany atap ótildi. Jobany qarjylandyrýdy sheteldik nesıeler esebinen júzege asyrý kózdelgen.

Sondaı-aq, respýblıkanyń magıstraldyq gaz tasymaldaý júıesin jańǵyrtý jáne tıimdiligin arttyrý (2021-2024 jj.) baǵdarlamasyn iske asyrý jalǵasatyn bolady. Jalpy quny 483 mıllıon dollardy quraıtyn jobada 511 shaqyrym magıstraldyq gaz qubyry men 10 gaz nasos agregatyn jańǵyrtý kózdelgen.

Aqparat úshin, 2023 jyl 7 qazanda Qazaqstan, Ózbekstan jáne Reseı prezıdentteri Máskeýde ótken sharada Reseı gazyn Qazaqstan arqyly Ózbekstanǵa jetkizý protsesin bastap berdi. Osy maqsatta 1960 jyldary Túrkimenstan men Ózbekstannan Reseıge gaz tasymaldaý úshin salynǵan «Ortalyq Azııa-Ortalyq» magıstraldyq jelisi keri jumys isteýge beıimdeldi.

«UzGasTrade» jáne «Gazprom eksport» arasyndaǵy kommertsııalyq kelisimshart 2 jyl merzimge jasalǵan jáne táýligine 9 mıllıon tekshe metr tabıǵı gaz jáne jylyna shamamen 2 mıllıard 800 mıllıon tekshe metr tabıǵı gaz satyp alýdy kózdeıdi.

Máskeýde ótken sharada Reseı gazyn Qazaqstan arqyly Ózbekstanǵa jetkizý protsesin bastap berdi.