Ózbekstan iri qara mal ósirý úshin Belarýsten jerdi jalǵa alady

TAShKENT. KAZINFORM – Ózbekstan Belarýs aýmaǵyndaǵy 4 myń gektar egistik jerdi uzaq merzimge jalǵa alýǵa ýaǵdalasty, dep habarlaıdy Kazinform agenttiginiń Tashkenttegi menshikti tilshisi.

Dunyo aqparat agenttiginiń málimetinshe, Qashqadarııa oblysynyń delegatsııasy Belarýs eline jumys saparymen bardy. Onyń barysynda ózbek tarapy Vıtebsk oblysynyń birqatar aýdanyndaǵy mal sharýashylyǵy keshenderi men saýda nysandarynyń jumysymen tanysty.

Vıtebsk oblystyq atqarý komıtetiniń basshylyǵymen ótken kezdesýde taraptar ekonomıkalyq yntymaqtastyqty nyǵaıtý jáne ózara tıimdi óndirister qurý múmkindikterin talqylady.

Sonymen qatar sapar aıasynda «Asl Yuksalish Savdo», «Muborak qorako‘lchilik» kásiporyndary men Shýmılın aýdanynda ornalasqan «Sırotınsk» mal sharýashylyǵy fermasymen kelisim jasaldy. Ýaǵdalastyqqa sáıkes, ózbek tarapy 4 myń gektar egistik jerdi uzaq merzimge jalǵa alady. Atalǵan aýmaqta 1000 bas iri qara ósirý josparlanyp otyr.

Eske salaıyq, áýe kemesimen elge et tasymaldaıtyn ózbekstandyq kompanııalardyń 50% shyǵyny endi memleket esebinen óteledi.

Sondaı-aq, Ózbekstan 2027 jylǵa deıin Mońǵolııadan 100 myń bas usaq mal satyp alýǵa nıetti.