Ózbekstan iri AES salý jobasyna taldaý jasap jatyr
TAShKENT. KAZINFORM – Ózbekstan iri AES salý múmkindigin zerdelep jatyr. Bul týraly Kazinform agenttiginiń menshikti tilshisine suhbat bergen Uzatom agenttiginiń Atom elektr stantsııasy qurylysy dırektsııasynyń dırektory Otabek Amanov málim etti.
– Bıyl naýryzda eldegi atom energetıkasyn damytý týraly keńes ótti. Onda prezıdent Shavkat Mırzıeev Uzatom agenttiginiń dırektory Azım Ahmedhadjaevqa iri AES salý múmkindigin qarastyrýdy tapsyrdy. Qazirgi ýaqytta biz jobany zerdelep jatyrmyz. ıAǵnı, nysannyń tehnıkalyq jáne ekonomıkalyq aspektilerine taldaý jasalýda. AES-tiń modeli jáne qarjylandyrý kózderi máselesi pysyqtalady. Osy jumystardyń qorytyndysy boıynsha usynystar ázirlenedi, - dep jaýap qatty Otabek Amanov Kazinform tilshisiniń saýalyna.
Eske salaıyq, buǵan deıin Ózbekstan bıligi iri AES salý múmkindigin qarastyryp jatqanyn jazǵan edik.
Sonymen qatar qazirgi ýaqytta resmı Tashkent az qýatty AES salýǵa kiristi. Árqaısysynyń qýaty 55 MVt bolatyn 6 reaktor (jalpy qýaty – 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.
Jaqynda Kazinform agenttigine suhbat bergen Uzatom agenttiginiń dırektory Azım Ahmedhadjaev energetıkalyq nysannyń quny 2 mlrd dollardan aspaıtynyn aıtty.
Osyǵan saı, Ózbekstan men Reseı AES salý kelisimshartynyń kúshine ený hattamasyna qol qoıdy.
Sondaı-aq AES salý úshin halyqaralyq konsortsıým qurylady.