Ózbekstan prezıdentiniń Qazaqstanǵa saparynyń maqsaty belgili - saıasattanýshy
Osy saparǵa baılanysty búginde saıasattanýshylar ózderiniń túrli pikirleri men boljamdaryn aıtýda. Mamandardyń paıymynsha, Ózbekstannyń jańa basshysy Ortalyq Azııa memleketterimen qarym-qatynasty nyǵaıtýǵa aıryqsha múddelilik tanytýda. «QazAqparat» HAA tilshisine bergen suhbatynda qazaqstandyq saıasattanýshy Erlan Saırov osy saparǵa baılanysty óz pikirin bildirdi.
«Dúnıejúzindegi ekonomıkalyq damýdyń trendteri ózgerip jatyr, burynǵy tárizdi shıkizat ónimderimen damý endi múmkin emes. Sondyqtan Qazaqstanǵa óz ekonomıkasynda eksporttyq áleýetti ártaraptandyrýdyń joldaryn izdeý kerek. Sonymen birge árbir memlekette óziniń ekonomıkalyq damýy úshin juptas-seriktesi degen bolady. Bizge qazirgi tańda osyndaı úlken seriktes qajet. Meniń oıymsha, bundaı qarym-qatynasta Ózbekstan bolýy yqtımal»,-dep toqtaldy saıasattanýshy.
Onyń sózine qaraǵanda, 25 jyldyń ishinde atalǵan kórshiles el konservatıvtik-ekonomıkalyq saıasat júrgizdi. Ózbekstanda iri jáne orta kásiporyndardy jekeshelendirý bolýy múmkin, ıaǵnı memleket ekonomıkalyq turǵyda ashyq saıasatyn júrgizýi yqtımal.
«Qazaqstannyń bıznesmenderi úshin Ózbekstan jumys isteýge jańa keńistik bolady. Sonymen birge osy kórshiles eldiń Qazaqstanǵa eksporttyq áleýeti bar ekeni belgili, onyń ishinde jemis-jıdek, kókónis jáne basqa da ónimder jetkiziledi. Ekinshiden, bul elde avtomobıl óndirisi de damyǵan. Atap aıtqanda, Ózbekstan prezıdentiniń Astanaǵa saparynan ekonomıkalyq ıntegratsııanyń nyshandary paıda bolady degen oıdamyn. Biraq bul jerde bir kiltıpan bar. Ózbek halqy ejelden saýdaǵa beıim ekeni belgili. 25 jyl boıy Ózbekstanda jabyq ekonomıkalyq saıasat júrgizgenniń ózinde dúnıejúzinde ózbek mıllıarderlerdiń sany artyp keledi. Sondyqtan bul el bıznesi Qazaqstanda keńinen taralýy múmkin»,-dedi E. Saırov.
Onyń paıymynsha, elimizdegi keıbir ónerkásip oryndary men basqa da ınfraqurylymdar ózbekstandyq kásipkerlerdiń qyzyǵýshylyǵyn týdyrady.
«Ekinshi jaǵynan alyp qarasaq, Qazaqstanǵa qosymsha ınvestıtsııa keledi. Menińshe, eki eldiń arasynda saýda-sattyq, gýmanıtarlyq salada tyń serpin bolýy yqtımal. Baýyrlas el retindegi mádenı qatynastardyń barlyǵy qaıtadan qalpyna kelse, bul óz kezeginde qos memleketke de damýdyń jańa baǵytyn ashady»,-dedi ol.
Erlan Saırovtyń aıtýynsha, Ózbekstannyń prezıdenti Shavkat Mırzıeev Ortalyq Azııadaǵy baýyrlas memlekettermen qatynastardy nyǵaıtýǵa belgi berip jatqanyn ańǵarýǵa bolady.
«Budan buryn Elbasy Ortalyq Azııa odaǵyn qurý jóninde bastama kótergen bolatyn, endi osy bastamanyń ary qaraı logıkalyq jalǵasy bolýy múmkin. Jalpy, túrkitildes halyqtardyń ekonomıkalyq-gýmanıtarlyq odaǵynyń bolýy qolaıly ári ózekti. Atalǵan Ortalyq Azııa memleketteri odaǵyn qurý durys saıasat dep esepteımin»,-dep atap ótti ol.
Saıasattanýshy Ózbekstannyń Eýrazııalyq ekonomıkalyq odaqqa kirýi nemese qosylmaýy qadamy jaqyn bolashaqta belgili bolatynyn jetkizdi.
