Ózbekstan Prezıdenti Túrkistan oblysyndaǵy apat saldaryn joıýǵa kómek berýge daıyn ekendigin aıtty
TAShKENT. ÓZA-QazAqparat - Ózbekstan Prezıdenti Shavkat Mırzııaev Syrdarııa oblysyndaǵy sý qoımasy bógetiniń buzylýynan sý basqan Qazaqstannyń Túrkistan oblysyndaǵy eldi mekenderde apat saldaryn joıýǵa qajetti kómek berýge daıyn ekenin bildirdi, dep habarlaıdy QazAqparat ÓzA agenttigine silteme jasap.
Ózbekstan Prezıdenti baspasóz qyzmetiniń málimetinshe, 27 sáýirge qaraǵan túni apat kezinde Buhara men Syrdarııa oblystaryndaǵy 38 myńnan astam úıge, 847 áleýmettik nysan men egistikterge zalal kelgen.
«Biz tabıǵı apattyń zardabyn joıý úshin barlyq qajetti sharalardy qoldanýdamyz. Úkimettik komıssııa táýlik boıy jumys istep tur. Búginge deıin áleýmettik nysandardyń 70 paıyzy jáne úılerdiń 20 paıyzynyń shatyrlary jabylǵan. Sonymen qatar, 5 000 shaqyrym elektr jelisi, 1100 transformator jóndelgen...
Ókinishke oraı, osy ýaqytqa deıin tabıǵı apat saldarynan 4 azamatymyz qaıtys boldy, 1 adam habar-osharsyz ketti. Qaza bolǵandardyń otbasy men jaqyndaryna qaıǵyryp kóńil aıtamyn», - dedi Shavkat Mırzııaev Buhara men Syrdarııada bolǵan apatqa qatysty jıynda.
Onyń aıtýynsha, sý qoımasynda bolǵan jaǵdaıǵa baılanysty halyqaralyq sarapshylardy tarta otyryp, barlyq bógetterge tereń saraptama júrgizilmek.
«Ókinishke oraı, Sardobadaǵy apat saldarynan kórshiles Qazaqstan Respýblıkasy Túrkistan oblysynyń Maqtaraly aýdanyndaǵy eldi mekenderdi de sý basty. Biz Qazaqstan Prezıdenti Qasym-Jomart Toqaevpen telefon arqyly sóılesip, bul máseleni ózara túsinistikpen, ashyq ári keńinen talqyladyq. Keshe Túrkistan oblysynyń ákimi Ómirzaq Shókeev bastaǵan delegatsııa oqıǵa ornyna baryp, jaǵdaıdy jan-jaqty zerttedi», - dedi beınekonferentsııada Ózbekstan Prezıdenti Shavkat Mırzııaev.
«Bul tehnogendik kútpegen apat tek bizdiń turǵyndarǵa ǵana emes, sonymen birge kórshi qazaq baýyrlarymyzǵa da úlken zııan keltirgeni óte uıatty boldy. Olardyń mekendeıtin jerine jáne egistik alqaptaryna zııan keltirilgenine de ókinemiz», - dedi Ózbekstan Prezıdenti.
Onyń aıtýynsha, úkimet, tıisti mınıstrlikter men vedomstvolar, jergilikti bılik organdary, basqa da sheneýnikter men sarapshylar ózderiniń qazaqstandyq áriptesterimen birge tabıǵı apattardyń saldaryn joıý úshin tyǵyz jumys isteıtin bolady.
«Sondaı-aq, biz tabıǵı apattyń saldaryn joıýda qazaqstandyq baýyrlarymyzǵa qajetti kómek kórsetýge daıyn ekenimizdi bildirdik. Biz bul qıyndyqtardy halqymyzben birge, ózara yntymaqty túrde jeńetinimizge senimdimin», - dedi Ózbekstan Prezıdenti.
