Ózbekstan prezıdenti memlekettik saparmen Qazaqstanǵa keledi
ASTANA. QazAqparat - 2017 jyldyń birinshi jartyjyldyǵynda Ózbekstan prezıdenti Shavkat Mırzıeev memlekettik saparmen Qazaqstanǵa keledi.
Bul týraly Sputnik Ózbekstanǵa Qazaqstannyń Tashkenttegi ókildiginen habarlady, dep jazady CA-News.
Habarlamaǵa súıensek, QR Prezıdenti Nursultan Nazarbaev ózbekstandyq áriptesin qonaqqa shaqyrǵan. Sapar aıasynda ekijaqty strategııalyq seriktestikke qatysty barlyq máseleler men ony ary qaraı damytý jaıy talqylanady.
«Bizdiń qarym-qatynasymyz 2016 jyldyń sońynda jáne 2017 jyldyń basynda zor qarqynmen damýda. Sáıkesinshe, sheshimin tappaǵan máseleler legi de paıda boldy. Osyǵan oraı, eki el basshylarynyń kezdesýi oryndy ári mańyzdy», - dep túsindirdi Qazaqstannyń Ózbekstandaǵy elshiligindegi derekkóz.
Buryn habarlanǵandaı, Shavkat Mırzıeev Ózbekstan prezıdenti retinde alǵashqy resmı saparyn Reseıge jasaýdy josparlaýda. Ózbekstan vedomstvosy memleket basshysynyń RF-ke resmı saparyna qazirdiń ózinde daıyndyqty bastady.
